Dál osy ala dorbadaǵy qap-qap aqsha qalyń kópshiliktiń jaǵasyn ustatqan edi.
Byltyr dál osy sáýir aıynda Taldyqorǵan bilim bóliminiń esepshisi ala sómkelerge aqshany toltyryp, qashyp bara jatqan jerinen ustalǵany el esinde, dep habarlaıdy almaty-akshamy.kz. Osy iske qatysty sot otyrysy bastaldy. Qalalyq bilim bóliminiń bas esepshisine jáne 20-ǵa jýyq bilim mekemesiniń býhgalterlerine 4,6 mrld teńgege jýyq qarjyny jymqyrdy degen aıyp taǵylyp otyr.
245 tomnan turatyn is Jetisý oblystyq qylmystyq ister boıynsha aýdanaralyq mamandandyrylǵan sotynda qaralyp jatyr. Barlyǵy 20 kúdikti. Jymqyrylǵan qarajat somasy 4 mlrd 570 mln teńgeden asady. Memlekettik aıyptaýshynyń aıyptaý aktisin tanystyrýǵa 4 saǵattan astam ýaqyty ketti. Aıta ketý kerek buǵan deıingi otyrysta prokýror sottalýshylardy úkim shyqqansha qamaýda ustaý turaly usynys joldaǵan bolatyn. Sot usynysty ishinara qanaǵattandyrdy. Qazirgi tańda 16 adam qamaýda otyr. Qalǵan 4 azamatshanyń biri zeınet jasynda bolǵandyqtan, eki kúdikti júktiligi boıynsha jáne bireýi densaýlyǵyna baılanysty úıqamaqta otyr.
Saıan Dúısebaev, Jetisý oblystyq prokýratýrasy 2-shi basqarma bastyǵynyń orynbasary:
Bilim berý bóliminiń ortalyqtandyrylǵan býhgalterıasynyń býhgalterlary jáne mektep býhgalterlaryna qatysty uıymdasqan topty qurý jáne uıymdasqan top quramyna qatysý, sonymen qatar uıymdasqan top quramynda bolyp búdjet qarajatyn asa iri mólsherde jymqyrý baptarymen is qaralyp jatyr.
Kópshiliktiń jaǵasyn ustatqan bul isti tergeý ótken jyly bastalǵan bolatyn. Qalalyq bilim bóliminiń bas esepshisi asa iri kólemde qarjy jymqyrdy degen kúdikke ilinip Panfılov aýdanynda ustalǵan. Tintý barysynda esepshiden 1 mlrd teńgege jýyq qolma-qol aqsha tabyldy. Munan bólek 20-dan astam jyljymaıtyn múlik pen birneshe kólik jáne baǵaly áshekeıler tárkilendi. İs óte aýqymdy bolǵandyqtan sot otyrysy aptasyna úsh ret ótetin boldy.