Sońǵy jyldary naqty sektorǵa qaraǵanda, qyzmet kórsetý salasynda jumyspen qamtylǵandardyń sany ósken.
Mınıstrlik basshylyǵy taksı júrgizýshiler men kýrerlerdi áleýmettik qamsyzdandyrý júıesine tartý úshin onlaın platformalardyń negizgi operatorlarymen kezdesti, dep habarlaıdy Almaty-akshamy.kz.
Eńbek jáne halyqty áleýmettik qorǵaý mınıstri Tamara Dúısenova onlaın platformalarda isteıtin qazaqstandyqtar áleýmettik qamsyzdandyrý júıesine qosylatynyn málimdedi.
Mınıstrdiń aıtýynsha, pandemıa kezindegi karantındik shekteýler álemde jumyspen qamtýdyń zaman talabyna beıim tásilderin qoldanýǵa tyń serpin berdi. Bul úrdisten Qazaqstan da shet qalǵan joq. Buǵan qosa, el ekonomıkasyna sıfrlandyrý men jańa tehnologıalar da óz áserin tıgizýde. Sońǵy jyldary naqty sektorǵa qaraǵanda, qyzmet kórsetý salasynda jumyspen qamtylǵandardyń sany ósken.
«Saraptamalyq málimetterge júginsek, Qazaqstanda 500 myńdaı adam platformalyq jumyspen qamtylǵan. Iaǵnı, azamattar Iandeks, Ýber, Vólt jáne Glovo sıaqty túrli onlaın-platformalar arqyly jumys isteıdi. Mundaı rejım turǵyndarǵa óte yńǵaıly ekeni sózsiz. Alaıda onyń basty kemshiligi – jumyspen qamtylǵandar úshin áleýmettik kepildiktiń joqtyǵy», - dedi Dúısenova Úkimet otyrysynda.
Iaǵnı azamat jumyssyz qalsa nemese júktiligine jáne balaly bolýyna baılanysty jumysyn toqtatsa, Memlekettik áleýmettik saqtandyrý qorynan qajetti áleýmettik tólem ala almaıdy.
«Osyǵan baılanysty bul azamattardy áleýmettik qamsyzdandyrý júıesine tartý úshin onlaın platformalardyń negizgi operatorlarymen kezdestik. Olarmen birge bıylǵy 1 shildeden bastap qamtý sqemalaryn pılottyq rejımde júrgizý týraly sheshim qabyldadyq. Jumystyń nátıjesin jyl sońyna qaraı usynamyz», - dedi mınıstr.
Mınıstrlik platformalyq jumyspen qamtýdy tanyp, ony zańdastyrý arqyly azamattarǵa yńǵaıly rejımdi saqtaı otyryp, olardyń eńbek jáne áleýmettik quqyqtaryn qorǵaýdy kózdep otyr.