Qytaı álemdegi eń úlken, ári uzyn shólderdiń biri Takla-Makan aınalasyndaǵy aınalma temirjol jelisiniń sońǵy bóligin iske qosty.
Ol eldiń soltústik-batysyndaǵy Shyńjań-Uıǵyr avtonomıalyq aýdany arqyly ótedi. Temirjol jelisiniń uzyndyǵy 825 shaqyrymdy quraıdy. Onyń boıymen júretin poıyzdardyń jyldamdyǵy saǵatyna 120 km-ge deıin jetedi, dep habarlaıdy Almaty-akshamy.kz Qazaqtv.com saıtyna silteme jasap.
Jol boıynda 22 stansıa bar, onyń 11-i jolaýshylardy qabyldasa, altaýy júk tasymalyna arnalǵan. Jalpy shóldi aınalyp ótý úshin barlyǵy 11 saǵattan sál astam ýaqyt kerek. Eske salaıyq, tabıǵı landshafttyń kúrdeliligine baılanysty temirjol qurylysy úsh jarym jylǵa sozyldy. Relsti qumdy daýyldan qorǵaý úshin joldyń keı bóligi kópir sıaqty salyndy. Sondaı-aq, qumnyń kóshýin toqtatý úshin 13 mln asa tal otyrǵyzyldy. Bılik temirjol jelisiniń ashylýy vagon poıyzdarynyń shóldi tolyǵymen aınalyp ótýine múmkindik beredi dep otyr. Sondaı-aq, Shyńjańnyń maqta, jańǵaq, qurma jáne mıneraldar sıaqty brendtik taýarlarynyń jóneltilýi men logıstıkasyn jeńildetedi.
"Bul ońaı joba bolǵan joq. Jumysshylar únemi qumdy daýylmen kúresýge májbúr boldy. Joldyń 65 prosenti shól dalanyń ishimen ótedi. Temir joldyń qalypty jumys isteýi úshin onyń jolyna qum túsýine jol bermeý kerek, sebebi bul qozǵalysqa qaýip tóndirýi múmkin", - dedi Shyńjań Temir joly Partıa Komıtetiniń hatshysy Van Szınchjýn.