Zıka vırýsyn juqtyrǵan kezde onyń belgileri birden baıqalmaıdy
Taılandta demalǵan majarlyq eki týrısi tropıkalyq masa shaǵyp, Zıka vırýsyn juqtyrǵan. Bul týraly Býdapesht ulttyq qoǵamdyq densaýlyq saqtaý ortalyǵynyń ókilderi málimdedi, dep habarlaıdy Almaty-akshamy.kz Tengritravel.kz-ke silteme jasap.
Vedomstvo málimetinshe, qýanyshqa oraı, Taılandtan kelgen týrıserden tek jeńil belgileri anyqtalǵan.
«Zıkaǵa qarsy vaksına nemese em bolmaǵandyqtan, tropıkalyq jáne sýbtropıkalyq aımaqtarǵa saparlaý kezinde vırýsty taratatyn masalardyń shaǵýynan qorǵaný óte mańyzdy», - dedi Majarstannyń qoǵamdyq densaýlyq saqtaý basqarmasynyń ókilderi.
Týrıserge árdaıym ózderimen birge jándikterge qarsy quraldardy alyp júrýge, moskıt torlaryn qoldanýǵa, sondaı-aq aıaqtaryn tolyǵymen jabatyn uzyn jeńdi fýtbolkalar men shalbar kıýge keńes berildi.
Medısınalyq málimetterge sáıkes, Zıka vırýsyn juqtyrǵan kezde onyń belgileri birden baıqalmaıdy jáne tek keıbir juqtyrǵandar 3-14 kúndik ınkýbasıalyq kezeńnen keıin jeńil belgilerdi kórsetedi. Bul qyzba nemese dene qyzýynyń kóterilýi, álsizdik, bas aýrýy, bórtpe, býyn aýrýy, konúnktıvıt bolýy múmkin.
«Júkti áıelder juqtyrǵan kezde uryqta týa bitken júıke damýynyń aýytqýy paıda bolýy múmkin, sondyqtan bolashaq analar tropıkalyq elderge barǵan kezde densaýlyǵyn muqıat qadaǵalap otyrýy kerek», - deıdi mamandar.
Zıka vırýsy – Afrıkanyń, Amerıkanyń, Azıanyń jáne Tynyq muhıtynyń tropıkalyq jáne sýbtropıkalyq aımaqtarynda kezdesetin qozdyrǵysh, ol negizinen masalardyń shaǵýy arqyly taralady, biraq ınfeksıa jynystyq jolmen nemese júkti anadan uryqqa da berilýi múmkin.