Almatyda Satybaldy Narymbetov týraly derekti fılmniń tusaýy kesildi
Almatyda belgili kınorejısser, jazýshy, kınodramatýrg, Qazaqstannyń eńbek sińirgen qaıratkeri Satybaldy Narymbetovti eske alýǵa arnalǵan «Tarıh týdyrǵan tulǵa» atty derekti fılmniń tusaýkeseri ótti, dep habarlaıdy Almaty-akshamy.kz QazAqparatqa silteme jasap.
Derekti fılmniń tusaýkeserine Satybaldy Narymbetovtiń týystary, tanymal kınogerler men BAQ ókilderi qatysty. Belgili kınorejısserdi eske alýǵa arnalǵan derekti fılmniń avtory — rejıser Satybaldy Tekeev. Onyń aıtýynsha, derekti fılmde qazaq kıno óneri maıtalmanynyń júrip ótken joly men shyǵarmashylyǵy baıandalady.
«Qazaq kınosynda jazýshylyqtan rejıssýraǵa aýysqan, Sháken Aımanov, Májıt Begalın, Sultan Qojyqov, Abdýlla Qarsaqbaev syndy qazaq kınosynyń sheberlerinen keıingi tolqynnyń birtýar tulǵasy ol – Satybaldy Narymbetov. Negizi Sákeń jaıly derekti fılm túsirýdi onyń kózi tirisinde, 75 jasqa tolar shaǵynda bastaǵanbyz. Osy kezde pandemıa bastalyp ketti. Qarjylyq jaǵynan da qysyltaıań kezeń boldy. Alaıda, ótken jyly qarjylaı kómek tabylyp, ótken jyldyń jeltoqsan aıynda fılmdi túsirip bitirdik. Bul fılmdi biz Sákeńniń ómiri men shyǵarmashylyǵyn keleshek urpaq kórsin, bilsin, onyń ómirbaıany máńgilik tarıhta qalsyn degen maqsatpen túsirdik. Bul Satybaldy jaıly túsirilgen alǵashqy derekti fılm. Aldaǵy ýaqytta Sákeńniń týǵan kúnine oraı derekti fılmdi «Qazaqstan» ulttyq arnasynda kórsetetin bolady»,- dedi Satybaldy Tekeev.
Shara barysynda mádenıet, óner salasynyń ókilderi Satybaldy Narymbetov jaıly estelikterimen bólisti.
Qazaq kompozıtory, kúıshi, dombyrashy, Qazaqstannyń eńbek sińirgen ártisi Seken Turysbekov derekti fılmdi kórgennen kóńili bosaǵanyn jetkizdi.
«Derekti fılm qońyr ún, qońyr kúı, bári qońyrdan turatyn tátti muń sekildi. Satybaldy qazaqtyń tarıhyn, taǵdyryn sonaý tereńnen qozǵap, jalpaq jurtqa jetkizýi – onyń ómirlik armany ispetti boldy. Ol kóbinese jazýshy, dramatýrg Aqsar Súleımenovke elikteıtin. Satybaldynyń oılaǵan oılary men sózderinde Asekeńniń yqpaly bolýy múmkin. Al sol oılaryn onyń halyqqa jetkizýin men úlken baqyt dep oılaımyn»,- dedi Seken Turysbekov.
Jazýshy, kınodramatýrg, Qazaqstannyń eńbek sińirgen qaıratkeri Smaǵul Elýbaıdyń aıtýynsha, Satybaldy Narymbetov - óz halqyn súıip ótken adam.
«Satybaldy erekshe azamat edi. Ol barlyq adamdy jaqsy kórdi. Ásirese, óz halqyn, jasyn da, kárisin de jaqsy kórdi. Bul gýmanısik qaǵıdasy onyń ónerinde kórinetin. Halqyna degen uly mahabbat onyń júreginde ǵumyr boıy janyp turdy. Biz týra elý jyl dos boldyq. Ol óz-ózine eskertkish qoıǵan rejıser boldy. Sáke (Satybaldy Tekeev – red) siz dosyńyzǵa ekranda eskertkish qoıypsyz. Bul eńbegińiz qutty bolsyn. Endi Satybaldy Narymbetov jaıly áńgime bolsa bul fılmdi aınalyp ótpeıtin bolamyz»,- dedi Smaǵul Elýbaı.
Jazýshy Álıa Bópejanova derekti fılmde Satybaldy Narymbetovtiń tulǵalyq qasıeti dál ashylǵanyn aıtty.
«Árıne, bir derekti fılmde Sákeń týraly bárin aıtý múmkin emes. Bul Sákeń týraly úlken dastannyń basy dep oılaımyn. Biz áli Sákeńe oralatyn bolamyz. Ony uly sýretker, uly kınorejısser dep aıtsaq bolady. Jatqan jeri jaryq bolsyn», - dep eske aldy Álıa Bópejanova.
Kıno jáne teatr akteri, Qazaqstannyń eńbek sińirgen qaıratkeri Dýlyǵa Aqmolda Satybaldy Narymbetovtiń tiri kezinde bastalǵan «Jańǵyryq» fılminiń áli túsirilip bitpegenine ókinish bildirdi.
«Satybaldy aǵa bastap ketken fılmdi túsirýge balalary, «Qazaqfılm» kınostýdıasy, tipti, Mádenıet mınıstrligi atsalysyp jatyr. Degenmen, fılm áli túsirilip bitpeı jatyr. Bul óte ókinishti jaǵdaı. Sebebi, Satybaldy Narymbetov - dúnıejúzilik arenaǵa tanymal rejıser. Onyń bastaǵan dúnıesin bizdiń bitire almaı júrýimiz - ol bizdiń osaldyǵymyz dep bilemin. Ol namysqa tıetin nárse. Sondyqtan bul máseleni kóterý kerek dep oılaımyn», - dedi akter.
Satybaldy Narymbetovtiń uly, kıno operator Eskendir Narymbetov búgingi sharaǵa kelgen qonaqtarǵa, ákesi jaıly derekti fılmdi túsirgen Satybaldy Tekeevke alǵysyn jetkizdi.
«Búgingi sharaǵa kelgen barlyqtaryńyzǵa alǵys aıtamyn. Ákemizdi umytpaı, ony syılap, baǵalaǵandaryńyz úshin myń alǵys. Satybaldy aǵa ákem jaıly túsirgen derekti fılmińiz úshin kóp rahmet. Fılm óte tamasha shyqty. Maǵan qatty áser etti. Ákem ómirinde kóp nárseni jasaýǵa úlgermeı ketti. Sonyń biri - onyń sońǵy «Jańǵyryq» atty fılmi. Qazir bul fılmdi túsirip jalǵastyrý máselesi óte ózekti bolyp tur. Degenmen, biz ony túsirip bitiremiz dep oılaımyn»,- dedi Eskendir Narymbetov.
Aıta keteıik, Satybaldy Narymbetovtiń týǵan kúni qarsańynda «Qazaqfılm» kınostýdıasynyń «Juldyzdar aleıasyndaǵy» Satybaldy Narymbetov juldyzyna gúl shoqtary qoıyldy.
«Ulttyq kınematografıa sheberi – Satybaldy Narymbetovtyń esimi qazaq kınematografıasynyń altyn qoryna jazylǵan. Onyń talanty men sheberligimen jasalǵan kıno týyndylaryn qalyń kórermen «klasıkalyq shyǵarma» dep tanıdy. Ol jas urpaq úshin qurmet pen elikteýdiń úlgisi bolary sózsiz. Qazaqstandyq kórermender men ulttyq kınematografıanyń jankúıerleri belgili kınorejısserdiń shyǵarmashylyq úlesin joǵary baǵalaıdy», - dep habarlady «Qazaqfılm» kınostýdıasynyń baspasóz qyzmeti.