Qazaq halqynyń ejelgi ulttyq oıyndarynyń biri – «Taıaq tartý» bıyl qyrkúıek aıynda Astanada ótken Dúnıejúzilik Kóshpeliler oıyndarynda qaıta jandandy. Búginde bul oıyn Almaty oblysy boıynsha UQK Shekara qyzmeti departamentiniń tehnıkalyq jáne kásibı daıarlyq bólimderinde alǵash ret uıymdastyrylyp, erekshe tartyspen ótti.
Almaty oblysy boıynsha departamenttiń bastyǵy, polkovnık Á.Kaıýpovtyń bastamasymen shekarashylar arasynda «Taıaq tartý» oıynyn ótkizýge Qazaqstan Respýblıkasy Mas-Restlıng (taıaq tartý) federasıasynyń vıse-prezıdenti T.Qanalıev qoldaý bildirip, týrnır bastalar aldynda qatysýshylarǵa sheberlik sabaǵyn ótkizdi.
Saıys shekara basqarmasynyń Aqjardaǵy oqý ortalyǵynyń alańynda elimizdiń Ánuranymen bastaldy. Jaqynda Otanyna adal qyzmet etýge ant beretin «Kúz-2024» shaqyrylymynyń sarbazdary áskerı ómirge tez beıimdelip, sheberlikterin shyńdap úlgergenderin kórsetti.
Týrnırdi shekara basqarmasy bastyǵynyń orynbasary, podpolkovnık Saǵadat Áýezov ashyp, alǵashqy sózdi Mas-Restlıng federasıasynyń vıse-prezıdenti T.Qanalıevke berdi. Talǵat Talapuly shekarashylar tarıhynda tuńǵysh ret ótkizilgen «Taıaq tartý» oıynynyń mańyzyn aıta kele, týrnır qatysýshylary men jankúıerlerin óz komandasymen tanystyrdy.
Týrnırge «Búrkit», «Kókjal», «Aq bars», «Suńqar», «Qalqan» jáne «Arlan» komandalary qatysyp, óz baqtaryn synady. Saıysty federasıanyń bas hatshysy, halyqaralyq tóreshi Altyn Aqylbek basqardy. Taıaq tartý oıyny qatysýshylardy ǵana emes, kórermenderdi de baýrap aldy. Sarbazdar 50-den 80 kelige deıingi salmaq dárejesinde jarysqa túsip, komandalarynyń namysyn qorǵady. Keıbireýi qarsylasyn kúshpen jeńip, shekara syzyǵyn kesip ótkende, olardyń jeńiske degen qushtarlyǵyn anyq baıqaýǵa bolatyn.
Týrnır barysynda jankúıerler óz komandalaryn qyzý qoldap, saıyskerlerdi demeýin toqtatpady. 80 keliden joǵary salmaqtaǵy áskerı qyzmetshiler arasyndaǵy tartysty sátterde de qyzyqty kórinister oryn aldy. Alańǵa shyqqan iri deneli sarbazdar Qajymuqan atamyzdy eske túsirse de, keıbiri kúsh synasýda álsizdik tanytyp jatty.
Týrnır sońynda, jalpykomandalyq esepte 1-oryndy «Suńqar» toby, 2-oryndy «Aq bars», 3-oryndy «Búrkit» toby ıelendi. Týrnırdiń tabysty ótýine úles qosqan mártebeli qonaqtar men uıymdastyrýshylar departament bastyǵynyń Alǵys hatymen marapattaldy.
Qorytyndylaı kele, shekarashylar úshin shapshańdyq pen eptilikti qajet etetin «Taıaq tartý» shyn máninde rýhty oıyn ekenin dáleldedi.