92-mınýtta Zakarıa Abýhlál gol soǵyp, qorytyndy esepti belgiledi
Qatarda ótip jatqan fýtboldan 2022 jylǵy álem chempıonatynyń F tobynda sensasıa tirkelip, Marokko quramasy Belgıadan basym tústi, dep habarlaıdy Almaty-akshamy.kz QazAqparatqa silteme jasap.
Álemniń aldyńǵy qatarly quramasynyń biri sanalatyn Belgıa dop dodasynda ázirge ádemi oıyn órnegimen kózge túse almaı keledi. Alǵashqy týrda Kanadany 1:0 esebimen jeńgen olar ekinshi týrda jankúıerlerdi jigerli qımylmen jelpindiremiz degen nıet tanytqan edi.
Birinshi oıynynda Horvatıamen 0:0 esebimen teń túsken marokkolyq fýtbolshylar azýly qarsylasyna tegeýrindi qarsylyq kórsetti. Oıynnyń birinshi kezeńinde oıyn alma-kezek shabýylmen órbip jatty. Kez kelgen sátte tablodaǵy esepke ózgeris enýi múmkin bolatyn. Tipti, 45+3 mınýtta Hakım Zıesh tepken dop qaqpa torynda týlap jatty. Tóreshiler marokkolyq fýtbolshylar oıynnan tys qaldy degen sebeppen ony jaratpaı tastady.
Ekinshi kezeńde belgıalyq fýtbolshylar belsendi qımylymen kózge tústi. Degenmen, dittegen maqsatyna jete almaı jatty. Olardyń qatarynan Eden Azar tepken dopty marokkolyq qaqpashy Mýnır syrtqa shyǵaryp úlgerdi.
Odan keıingi ýaqytta Afrıka qurlyǵynyń ókilderi de qarsy shabýylǵa shyqty. Osyndaı sátterdiń birinde aıyp dobyn oryndaǵan Abdelhamıd Sabırı belgıalyq qaqpashynyń osal tusyn taýyp ketti. Al, 92-mınýtta Zakarıa Abýhlál gol soǵyp, qorytyndy esepti belgiledi.
Osylaısha, álem chempıonatynda taǵy bir márte sensasıa tirkeldi. Marokko quramasy Belgıadan 2:0 esebimen basym tústi.