Jas otbasynda birden úsh qyz bala dúnıege keldi
Almaty oblysynda 26 jastaǵy jas ana úshem dúnıege ákeldi. Sábılerdiń úsheýi de - qyz bala, dep habarlaıdy Almaty-akshamy.kz
Úshemderdiń anasy - Kóksý aýdanynyń turǵyny Ardagúl Áskerbek. Ol - Taldyqorǵandaǵy qoǵamdyq-saıası «Alataý» gazetiniń tilshisi. Bul basylymdy belgili aıtysker aqyn Aıtaqyn Bulǵaqov basqarady. «26 jastamyn.Tuńǵyshym bes jasta. Bir qyzym, eki ulym bar. Búgin, mine, úshemniń ata-anasy atanyp, 6 balaly boldyq. Táýbá, Allanyń qalaýy. Negizi joldasym jaqtan da, ózim jaqtan da tuqymymyzda egiz bar. Biraq úshem joq», - deıdi jýrnalıs, jas bosanǵan ana Ardagúl Áskerbek.
Ardagúl búgin Taldyqorǵan qalasyndaǵy oblystyq perınataldyq ortalyqta tańerteń saǵat 10:10 shamasynda bosanǵan. «Sábılerimniń jaǵdaıy jaqsy. Salmaǵy - 1900 g, 1800 g jáne 1700 gram. Qazir dárigerlerdiń baqylaýynda», - dedi jas ana. Shańyraǵy shattyqqa bólenip jatqan jas otbasy ata-anasymen birge turady.
Esterińizge sala keteıik, búgin elimizde taǵy bir otbasynda úshem dúnıege kelgenin habarlaǵan bolatynbyz.