«Hit beat music» atty qarjy pıramıdasy anyqtaldy.
Qarjy monıtorıńi agenttiginiń Almaty qalasy boıynsha departamenti Hit beat music dep atalatyn qarjy pıramıdasyn qurý jáne basqarý kúdigi boıynsha sotqa deıingi tergeýdi bastady, dep habarlaıdy Almaty-akshamy.kz.
Ulysmedia.kz caıtynda jarıalanǵan aqparatqa sáıkes, kúdikti jarnamalyq shoý-prezentasıa ótkizý kezinde ustaldy.
«Hit beat music (HBM Group) ınvestısıa salasyndaǵy aqparattyq-taldamalyq kompanıa retinde jasyrynyp, óziniń zańsyz qyzmetin júzege asyrǵan. Kompanıa sengish azamattarǵa turaqty syıaqy alýǵa kepildik beretin kanadalyq mýzykalyq ınvestısıalyq jobalarǵa aqsha salýdy usyndy. Sonymen qatar, Hit beat music (HBM Group) Qazaqstan aýmaǵynda zańdy tulǵa, ókildik jáne fılıal retinde tirkelmegen, sondaı-aq ashyq banktik shoty joq. Salymshylardyń jarnalary kiris kasalyq orderlerin resimdemeı qolma-qol nysanda júrgiziledi. Tirkelgen paıdalanýshylardyń jalpy sany 2300-den asady», – delingen habarlamada.
Qazirgi ýaqytta «Hit beat music» uıymdastyrýshysy 2 aıǵa qamaldy.
QMA men prokýratýra organdary azamattardy qyraǵy bolýǵa jáne óz jınaqtaryn kúmándi qarjy uıymdaryna salmaýǵa shaqyrdy.