Qazaqstannyń bas prokýratýrasy asa iri alaıaqtyq jasady degen taǵy bir kúdiktini Reseıden ekstradısıalady, dep habarlaıdy aqshamnews.kz.
Vedomstvonyń málimetinshe, kúdikti 2019-2022 jyldar aralyǵynda Taraz qalasyndaǵy bank fılıalynyń qyzmetkeri bolyp jumys istegen. Sóıtip bank klıentteriniń atynan nesıe rásimdegen.
«Bank klıentteriniń shottaryna qol jetkizgen kúdikti qarajatty dostarynyń esepshotyna aýdaryp, keıin ony qolma-qol aqshaǵa aınaldyrǵan. Qylmystyq áreketter nátıjesinde bank klıentterine 60 mıllıon teńge kóleminde zalal keltirgeni belgili boldy. Qylmys jasaǵannan keıin kúdikti jasyrynyp, oǵan halyqaralyq izdeý jarıalandy», - delingen habarlamada.
Kúdikti bıyl sáýir aıynda Krasnodar ólkesiniń aýmaǵynda ustaldy. Sóıtip elimizdiń Bas prokýratýrasynyń suraýymen Qazaqstanǵa ekstradısıalandy. Qazir kúdikti ýaqytsha ustaý ızolátoryna qamaldy. Qylmys úshin onyń múlki tárkilendi. Kúdikti bes jyldan on jylǵa deıingi merzimge bas bostandyǵynan aıyrylýy múmkin.