Grýzıa parlamentiniń spıkeri Shalba Papýashbılı bıliktegi «Grýzın armany – demokratıalyq Grýzıa» partıasynyń LGBT nasıhatyna jáne jynys aýystyrýǵa tyıym salatyn zań jobalarynyń paketi kún tártibine engizilip jatqanyn habarlady.
Bul jaıynda islam.kz portaly lenta.ru aqparat kózine silteme jasaı otyryp málim etken, dep habarlaıdy Almaty-akshamy.kz.
Bılik partıasy «Otbasy qundylyqtary jáne kámeletke tolmaǵandardyń quqyqtaryn qorǵaý týraly» zań jobasy negizinde respýblıka konstıtýsıasyna tıisti túzetýler engizýdi kózdep otyr. Atalmysh zań jobasy qoǵam qoldaýyna ıe bolǵanyn jetkizdi parlament jetekshisi.
Bul baǵyttaǵy zań jobalary paketinde bir jynysty nekeni tirkeýge; jynysyn ózgertken nemese bir jynysty tósek qatynasyndaǵy adamdardyń kámeletke tolmaǵan balalardy asyrap alýyna; resmı qujattarda bıologıalyq (tabıǵı) jynysynan ózgeshe jynysyn kórsetýge; jynys aýystyrý operasıalaryna tyıym salý qarastyrylǵan. Buqaralyq aqparat quraldarynda bir jynystylardy dáripteıtin kórinisterdi jáne uqsas mazmundaǵy jarnamalardy taratýǵa tyıym salynady. Sonymen qatar, bul tarapaǵy túzetýler boıynsha LGBT ıdeologıasyn nasıhattaýǵa baǵyttalǵan qoǵamdyq jıyndarǵa tyıym salynady, kompanıalar qyzmetkerlerdiń bıologıalyq jynysy eskerilmegen eńbek kelisimderin jasaı almaıdy, t.b. Zańnamalyq túzetýler kúzde túpkilikti qabyldanady.
Osy oraıda elimizde de kóktem mezgilinde «Bala quqyǵy týraly» zańǵa túzetýler engizilgenin aıty ketpekpiz. Túzetýlerge sáıkes bir jynysty tósek qatynasyndaǵy, sondaı-aq, bireýge jynystyq qysym kórsetip, qylmysker atanǵan tulǵalar, budan bólek, terorıstik nemese ekstremıstik áreketimen kózge túskenderge jáne adam saýdasy boıynsha sotty bolǵandarǵa bala asyrap alýǵa nemese qamqorshy bolýǵa tyıym salyndy.