Búginde Qazaqstan naryǵyna sheteldik áýe kompanıalardy tartý úshin kelissóz júrgizilip jatyr.
Bul týraly Kólik mınıstri Marat Qarabaev aıtty, - dep habarlaıdy almaty-akshamy.kz Massaget.kz-ke silteme jasap.
Búgin Májilistiń jalpy otyrysynda depýtat Aıdos Sarym ushaq bıletteri óte qymbat ekenin aıtyp, ony tómendetý úshin qandaı jumystar júrgiziletinin surady.
Onyń pikirinshe, tutynýshylar men sarapshylar áýe tasymaly baǵasynyń joǵary máselesin únemi kóterip júr.
«Bul týraly talaı depýtattyq saýal joldandy. Adamdar tómen búdjetti áýe kompanıasynyń bılet baǵasynyń kún saıyn qymbattap bara jatqanyn aıtady. Air Astana áýe kompanıasynyń enshilesi Fly Arystan jolaýshylardy qoljetimdi baǵamen qamtý úshin qurylǵan edi. Sondaı-aq ol ishki týrızmdi damytýǵa negizdelgen bolatyn. Al is júzinde loýkester bıletteriniń baǵasy bas kompanıamen baǵasymen teńesip, jyldan jylǵa ósip jatyr. Mundaı baǵa masqara emes pe? Kólik mınıstrligi bolashaqta azamattarymyz áýe bıletterin qoljetimdi baǵamen satyp alý úshin qandaı sharalar qarastyrady?» – dedi depýtat.
Mınıstr Marat Qarabaev máseleni sheshý úshin naryqtaǵy básekelestikti kúsheıtý kerektigin jetkizdi.
«2020-2021 jyldarmen salystyrǵanda áýe tasymalyna suranys 17%-ǵa ósti. Bıyl ol 26%-ǵa artty. Jalpy suranys artyp jatyr, al usynys oǵan tótep bere almaýda. Ol úshin ushaqtardyń sanyn ulǵaıtý qajet. byltyr 14 ushaq satyp alyndy. Bıyl jyl sońyna deıin áýe kompanıalary taǵy 11 ushaq satyp alady. Nátıjesinde qazaqstandyq ushaqtardy sany júzge jetedi jáne ondaǵy oryndyqtardyń sany 12 myńnan 15 myńǵa artady, taǵy 3 myń oryn qosylady. Oǵan qosa 2024-2025 jyldary taǵy 14 ushaq satyp alý josparlanyp otyr. Sondaı-aq básekelestikti de damytý kerek. Air Astana áýe kompanıasy Fly Arystan-dy jeke shyǵaryp jatyr. Nátıjesinde 4 áýe kompanıasy bolady, osylaısha básekelestik artady. Oǵan qosa biz sheteldik áýe kompanıasyn naryqqa tartyp. Ony besinshi kompanıa retinde damytý josparda bar», - dedi vedomstvo basshysy.
Májilis otyrysynan soń Marat Qarabaev Qazaqstan naryǵynda qandaı sheteldik kompanıa jumys isteıtinine qatysty túsinik berdi.
«Qazaq Air áýe kompanıasyn satamyz degen oı bar. Biz ony birneshe kompanıaǵa usyndyq. Onyń ishinde Vetnamnyń Sovico kompanıasy bar. Onymen kóbirek jumys istep jatyrmyz. Olar Qazaqstannyń ishki naryǵyn zertteýde. Sonymen qatar VietJet Air kompanıasy bar. Ol Qazaqstanda ushyp júr. Ol da loýkoster. Kompanıanyń ushaqtary óte kóp. Sony naryqqa tartamyz degen oı bar. Biraq bul másele qazir sheshilmeıdi», - dedi ol.