Almatyda úı kezeginde turǵan halyqtyń áleýmettik osal tobyna jatatyn úshinshi lektiń 105 turǵynyna jaldamaly páterdiń kilti tabystaldy, dep habarlaıdy almaty-akshamy.kz.
Naýryzbaı aýdanynyń «Shuǵyla» shaǵynaýdanyndaǵy «Alem City-2» turǵyn úı kesheninde ornalasqan 5 úıden kezekte turǵandarǵa 105 páterdiń kilti tabystaldy. Olardyń ishinde 43 páter 1 bólmeli, 62 páter 2 bólmeli.
HÁOT sanattary boıynsha: jetim balalar – 30, 1 jáne 2 toptaǵy múgedekter – 8, jeńildikteri boıynsha UOS-ǵa teńestirilgen ardagerler – 1, múgedektigi bar balalardy tárbıelep otyrǵan otbasy – 6, zeınetkerler – 8, tolyq emes otbasylar – 52.
Birer kún buryn HÁOT sanatyndaǵy kezekte turǵan birinishi lektegi 124 adamǵa jáne ekinshi lektiń 164 turǵynyna páter kilti tabystalǵan bolatyn. 
Baspanaly bolǵan jandardy Almaty qalasy Komýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly quttyqtap, jaldamaly páterler qalanyń komýnaldyq turǵyn úı qorynan bólingenin habarlady. Al qala turǵyny Vıktorıa Grıshına baspana kezegine 2015 jyly turǵanyn aıtady.
- Maǵan uıaly telefonǵa qońyraý shalyp, páterdiń ıesi bolǵanymyzdy aıtty. Basynda múldem senbedim. Biz úshin bul naǵyz baqyt áir tosyn syı! Ulymdy jalǵyz tárbıelep otyrmyn, sondyqtan men úshin memleketten úlken qoldaý boldy. Kezekke 2015 jyly turdym, - dedi Vıktorıa Grıshına.