Bakýde taekvondodan XXVI álem chempıonaty bastaý aldy
Búgin Ázirbaıjan astanasy Bakýde taekvondodan álem chempıonaty bastaldy, dep habarlaıdy Almaty-akshamy.kz sportty damytý dıreksıasynyń baspasóz qyzmetine silteme jasap.
Bıylǵy básekege 145 elden 950-den astam tańdaýly sportshy jınaldy. Olar alǵashqy jarys kúni Olımpıada baǵdarlamasyna kiretin eki salmaqta synǵa túsip jatyr.
Ulttyq qurama sportshylary – Eldar Birimbaı (68 kg) men Marıa Sevostánova (57 kg) jarysty 2-aınalymda aıaqtady.
Marıa 1-aınalymda chehıalyq Hana Flegrovany senimdi utqan. Osydan keıin tartysty jekpe-jekte tájirıbeli brazılıalyq Marıa Klara Lımaǵa jol berdi.
17 jastaǵy otandasymyz Ulttyq qurama sapyna bıyl qosyldy. Byltyr jastar arasyndaǵy Azıa jáne Qazaqstan chempıonatynyń kúmis júldegeri atanǵan.
Bıyl reıtıńtik týrnır – Slovenıa ashyq chempıonatynda top jarǵan. Bul onyń eresekter arasyndaǵy alǵashqy iri jarysy.
Eldar Bakýdegi alǵashqy jekpe-jeginde gabondyq Amar Musany aıqyn basymdyqpen jeńdi (2:0).
Alaıda kelesi kezeńde Parıj Gran-prıiniń jeńimpazy, álem reıtıńinde 5-orynda turǵan ıspanıalyq Haver Perez Polonyń myqty ekenin moıyndady.
«Osymen ekinshi ret álem chempıonatyna qatysyp turmyn. Manchesterde (2019 jylǵy – red) shırek fınalda utylǵanmyn. Osy joly júlde alamyn dep kelgen edim. Daıyndyǵym jaqsy boldy. Tek jekpe-jekterde bar bilgenimdi kórsete almadym. Bar qatelik ózimnen ketti», - dedi jekpe-jekten keıin Eldar Birimbaı.
Aıta keteıik, Bakýde taekvondodan XXVI álem chempıonaty bastaý aldy. Bıylǵy doda Halyqaralyq taekvondo federasásynyń 50 jyldyǵymen tuspa-tus kelip tur.
Aldaǵy aptada munda Parıj Olımpıadasyna qajet upaılar sarapqa salynady. Bul sportta reıtıńi eń joǵary báseke – Olımpıada oıyndary (G20).
Odan keıin álem chempıonaty (G14), Gran-prıdiń fınaly (G10) men Gran-prı sanatyndaǵy jarystar (G6) tur.
Bizdiń daıang sheberlerimiz táýelsizdik jyldary álem chempıonatynda barlyǵy 8 qola medalge qol jetkizgen.
Júldegerler: Qaırat Sarymsaqov (2019 ben 2017 jyly), Arman Shylmanov (2009 jyly), Aslan Batyqulov, Arman Shylmanov, Nazgúl Tájiǵulova (2007 jyly), Lıa Nýrkına (2003 jyly), Ádilhan Saǵyndyqov (1999 jyly).