Prezıdent "Maǵjan" pesasynan úzindi tamashalap, teatrdy aralady
Memleket basshysy Petropavldaǵy Sábıt Muqanov atyndaǵy Qazaq sazdy-drama teatrynda zıaly qaýym ókilderimen kezdesti, dep habarlaıdy Almaty-akshamy.kz.
Prezıdent Soltústik Qazaqstan oblysynyń ortalyǵynda jańadan boı kótergen Qazaq sazdy-drama teatrynyń ǵımaratyn aralap kórdi, dep habarlaıdy Aqorda.
Osy shyǵarmashylyq ujymda kóp jyldan beri eńbek etip kele jatqan teatr dırektory Birjan Jalǵasbaev óner ordasynyń ujymy bertinge deıin "Energetıkter saraıyn" panalaǵanyn, osy jyldar ishinde túrli janrda qoıylymdar sahnalap, halyqaralyq, respýblıkalyq baıqaýlarda júlde alǵanyn jetkizdi. Onyń aıtýynsha, jańa ǵımaratqa kóshken ujym repertýaryn jańartýǵa, sheteldik jáne otandyq óner ujymdarymen shyǵarmashylyq baılanys ornatýǵa múmkindik aldy.
Prezıdent "Maǵjan" pesasynan úzindi tamashalap, teatrdy aralady. Sodan keıin Qyzyljar ólkesiniń zıaly qaýym ókilderimen jáne qoǵam belsendilerimen áńgimelesti.
"Birligimiz – áralýandyqta. Bul – bizdiń eń basty uranymyz ári ustanymymyz. Qazaq bolsyn, basqa ult bolsyn – bárimiz bir halyqpyz. Sondyqtan bárimiz halqymyzdyń, elimizdiń órkendeýine qyzmet etýimiz kerek. Barshańyzǵa baq-bereke tileımin. Biz árdaıym birge bolamyz. Alǵa qadam basý úshin aýyzbirshiligimizdi, dostyǵymyz ben turaqtylyǵymyzdy kózdiń qarashyǵyndaı saqtaýymyz kerek. Árıne, elimizde áleýmettik-ekonomıkalyq jáne qoǵamdyq sıpattaǵy máseleler bar. Problemasyz el bolmaıdy. Tipti, eń damyǵan, baqýatty elderde de problema bar. Eger elde tártip bolsa, zań qatań saqtalsa, kózdegen nátıjege qol jetkizemiz", – dedi Memleket basshysy.
Prezıdent qoǵam belsendilerimen eldiń damýy jáne óskeleń urpaq tárbıesi jóninde pikir almasty. Sonymen qatar Memleket basshysy qazaq ádebıetiniń jarqyn ókili, aqyn Maǵjan Jumabaevtyń 130 jyldyǵyn joǵary deńgeıde atap ótý qajet ekenin aıtty.