Sıngapýr Prezıdenti Halıma Iakob Kúnsulý Zakarıany tabysty áıel retinde mysalǵa keltirdi.
Halıma Iakob Qazaqstandy áıelderge teń múmkindikter berý boıynsha tájirıbe almasýǵa shaqyrdy, dep habarlaıdy Almaty-akshamy.kz
«Sıngapýrda áıelderdiń múmkindikterin keńeıtýmen óte belsendi aınalysamyz. BUU esebine sáıkes, Sıngapýr áıelderdiń múmkindikterin keńeıtý salasynda 7-shi orynda tur. Sıngapýr Parlamentinde áıelderdiń úlesi 30%-ǵa jetedi jáne munymen toqtap qalmaımyz. Biz áıelderdiń memlekettik qurylym júıesinde qandaı ról atqaratyny týraly esep jarıaladyq jáne árqashan ınklúzıvti qoǵamǵa umtylamyz. Erler de, áıelder de – qoǵamdastyqtyń teń músheleri. Biz seriktestik qatynastarǵa negizdelgen osy tásildi ustanamyz», - dedi Sıngapýr Prezıdenti Nazarbaev ýnıversıtetinde ótken dáriste.
Sıngapýr Prezıdenti Qazaqstannyń teńdik ıdeıasyn ilgeriletý úshin Ortalyq Azıada alǵash ret áıelder máseleleri jónindegi arnaıy organ qurǵanyn atap ótti.
«Sonymen birge, Qazaqstanda sheshim qabyldaý prosesterine qatysatyn áıelder sany da artyp keledi. Bul kórsetkish 2030 jylǵa qaraı arta túsedi. Qazaqstan áıelderiniń joǵary bilimdi, jaqsy mansap qurýǵa umtylatynyn bilemin. Mysal retinde Ǵylym akademıasynyń prezıdenti Kúnsulý Zakarıany aıtqym keledi. Qazaqstandy áıelderge osyndaı múmkindik berý salasyndaǵy óz tájirıbesimen bólisýge shaqyramyn», - dedi Halıma Iakob.
Onyń aıtýynsha, taǵy bir negizgi baǵyt – eńbek naryǵyndaǵy teń múmkindikter. Sıngapýr úkimeti osy teń tásilge qol jetkizý úshin jumys berýshilermen, kásipodaqtarmen jumys istep jatyr.
«Bul eńbek naryǵy úshin qalypty nárse bolýy kerek. Erler men áıelder otbasynda jaýapkershilikti teń bólip, eńbek naryǵyna birdeı qol jetkizýi kerek», - dedi Sıngapýr prezıdenti.