Serik Jumanǵarın Qazaqstanda biryńǵaı ýaqyt beldeýin engizý máselesi boıynsha jumys tobynyń múshelerimen jáne óńir basshylarymen keńes ótkizdi
2024 jyldyń 1 naýryzynan bastap Qazaqstan Respýblıkasynyń búkil aýmaǵynda 5-shi saǵattyq beldeý (UTC +5) qoldanylady. Medısına, fızıologıa, geografıa, metrologıa salalarynyń mamandary byltyr jyl boıy Qazaqstan aýmaǵynda qolaıly ýaqyt beldeýin belgileý máselesin zerttep, osyndaı sheshimge kelgen.
Jumys tobynyń músheleri UTC +5 biryńǵaı ýaqyt beldeýi Qazaqstannyń kóptegen óńiriniń barynsha tabıǵı ýaqytqa jaqyn ýaqytty paıdalanatyn eń durys jáne ońtaıly nusqa degen kelisimge keldi.
Dese de elimizdiń jekelegen óńirlerinde, atap aıtqanda, Shyǵys Qazaqstan oblysynyń turǵyndary arasynda bul sheshim kóptegen suraq men túsinbeýshilik týdyrdy. 23-24 qańtarda jumys tobynyń músheleri kezekti ret SHQO-ǵa baryp, Menovnoe aýylynyń, sondaı-aq Altaı, Glýbokoe jáne Shemonaıha aýdandarynyń turǵyndarymen kezdesti. Úkimette ótken keńeste Serik Jumanǵarınge SHQO-daǵy sapar qorytyndysy jáne aldaǵy ýaqytta jańa ýaqyt beldeýine kóshetin basqa óńirlerdegi ahýal jóninde baıandaldy.
SHQO ákimi apparatynyń basshysy Erbol Nurǵalıev óńir turǵyndaryn tolǵandyratyn negizgi máseleler jóninde baıandady. Jańa ýaqytqa kóshkende aımaqta tańnyń erte atýy saǵat 03.15-te, al erte batýy – saǵat 15.20-da bolmaq. Bul másele boıynsha F.G.Fesenkov atyndaǵy «Astrofızıkalyq ınstıtýty» JSHS juldyzdar men tumandyqtar fızıkasy zerthanasynyń meńgerýshisi Lúbov Shestakova túsinikteme jasady.
«Eldi mekenderdegi jergilikti ýaqyt sol aımaqtaǵy kúnniń maksımaldy bıiktigimen, ıaǵnı tús mezgilindegi saǵat 12.00-ge sáıkestigimen anyqtalady. UTC+5 ortalyq merıdıan – osy merıdıandaǵy UTC+5 túski ýaqyt (shyǵys boılyq 75°) saǵat 12.00-ge sáıkes kelýi kerek degendi bildiredi. Ýaqyt beldeýiniń eni osy ýaqytqa +/- jarty saǵat bolýy múmkin. SHQO eki saǵattyq beldeý shekarasynda ornalasqan. Óskemende UTC +5 boıynsha tús mezgili saǵat 11.30-da bolady, sondyqtan qala osy ýaqyt beldeýine sáıkes keledi. Al kúnniń erte batýy men tańnyń atýyna qatysty másele – bul endi geografıalyq endikke baılanysty. Kúnniń uzaqtyǵy ońtústikte ıa bolmasa soltústikte turǵanymyzǵa baılanysty. Ońtústikte jazdaǵy jáne qystaǵy kún uzaqtyǵynyń aıyrmashylyǵy shamaly. Al soltústikte edáýir kóp. Tipti aq túnder bolady. Mysaly, mundaı kezderdi SHQO-da 22 maýsymda baıqaýǵa bolady», — dedi sarapshy.
Biraq bul jaǵdaılar ýaqyt beldeýine baılanysty emes.
Keńes qorytyndysy boıynsha vıse-premer Densaýlyq saqtaý mınıstrligine Saýda jáne ıntegrasıa mınıstrligimen birlesip, qysqa merzimde SHQO jáne basqa óńirler úshin Qazaqstanda biryńǵaı ýaqyt beldeýin engizýdiń barlyq núansy týraly aqparat qamtylǵan ádistemelik qural ázirleýdi, sondaı-aq qajet bolǵan jaǵdaıda, eń ózekti máselelerdi túsindirý úshin óńirge mamandar men memlekettik organdar basshylarynyń tobyn jiberýdi tapsyrdy.