Imýndyq jasýshalar arasynda óte kúshtileri de kezdesedi
Keıbir adamdardyń ımýndyq júıesi COVID-19-ǵa óte tózimdi, tipti ınfeksıa oshaǵynda júrse de vırýsty juqtyrmaıdy. Ǵalymdar muny jasýshalyq ımýnıtettiń kúshtiligimen jáne vırýsty týǵanynan qabyldamaıtyn qabiletimen baılanystyryp otyr, dep habarlaıdy Almaty-akshamy.kz.
RIA Novostıdiń málimetinshe, qozdyrǵysh adam aǵzasyna túskende ony T-lımfosıtteri qarsy alady. Olardyń mindeti - juqtyrǵan jasýshalardy tanyp, ony joıý, sonymen qatar bógde antıgender týraly maǵlumatty antıdene túzetin V-jasýshalaryna jetkizedi. Degenmen, alǵashqy ımýndyq jasýshalar arasynda óte kúshtileri de kezdesedi eken, olar maǵlumatty antıdenege jetkizbesten vırýsty ózderi-aq joıyp jiberýge qaýqarly.
Mundaı jaǵdaıda adamda klınıkalyq belgiler baıqalmaıdy, antıdene de túzilmeıdi, al PTR testi teris bolyp shyǵady. Biraq, aǵza ekinshi ret vırýs juqtyrmaý úshin qorǵanys qabiletine ıe bolady. Óıtkeni, T-lımfosıtterdiń arasynda patogendi este saqtaıtyn arnaıy T-jasýshalary bar. Mundaı ımýnıtettiń qanshalyqty turaqty ári uzaqqa shydaıtyny áli kúnge deıin tolyǵymen anyqtalmaǵan.
COVID-19-dyń alǵashqy tolqynynda ǵalymdar Londondaǵy áýlıe Varfolomeı aýrýhanasynda qyzyl aımaqat jumys istep júrgen medısına qyzmetkerlerine tórt aı boıy baqylaý júrgizgen. Olardan qan taldamasy men únemi PTR test alyp otyrǵan. Medısına qyzmetkerleriniń kóbi koronavırýspen aýyrǵan, alaıda vırýsty juqtyrý táýekeliniń joǵary bolýyna qaramastan 58 adamda ne aýrý belgisi, ne qanynda antıdene, tipten vırýsty RNK da bolmaǵan. Degenmen T-jasýshaly ımýndyq jaýaby myqty bolyp shyǵypty.
Aýyrmaǵandardyń jıyrmasynda T-jasýshasynyń deńgeıi joǵary bolsa, 19-da IFI27 ımýndyq júıesindegi aqýyz joǵary bolǵan. Sondaı-aq 58 adamda «seronegatıvti» T-jasýsha anyqtalǵan. Bul SARS-CoV-2 vırýsyn tanyp, ony joıatyn aqýyzdar klasteri, ıaǵnı koronavırýstyń kúsh almaı turyp alǵashqy kezeńinde joıyp jiberýge qajetti aqýyzdar.
Ǵalymdardyń oıynsha, vırýs bul adamdardyń aǵzasyna engen, biraq onda tirshiligin jalǵastyra almaǵan. Zertteý pandemıanyń alǵashqy kezeńinde bolǵandyqtan adamdardyń jasýshalarynda qorǵanys jadysy bolmaǵan, alaıda T-jasýshanyń myqty ımýndyq júıesi olardy qorǵaı bilgen.