Bıyl qysta Qazaqstan rekordty mólsherde gaz tutynǵan.
Qys qaharyna mingende, elde kógildir otyndy tutyný kólemi kúrt artqan. Sala mamandarynyń aıtýynsha, jylytý maýsymy kezinde saǵatyna 4 mln tekshe metr gaz qoldanyldy,
Buǵan deıingi maýsymdarda 3,5 mln tekshe metr shamasynda ǵana tutynylǵan edi. Qańtardaǵy sarshunaq aıazdyń saldarynan elimizde tabıǵı gazdy tutyný kólemi kúrt artqan, dep habarlaıdy Almaty-akshamy.kz.
24.kz aqparatyna sáıkes, byltyr táýligine 77 myń 400 tekshe metr qoldanylsa, bıyl bul kórsetkish 95 myń tekshe metrge jetken. Bul – buryń-sońdy bolmaǵan rekordtyq kórsetkish. Qazirgi tańda úkimet «QazaqGaz» Ulttyq kompanıasymen birge eldegi otyn-energetıkalyq qaýipsizdikti qamtýdyń josparyn aıqyndaǵan. Osy rette halyqtyń kógildir otyndy únemdep tutynýy asa mańyzdy, - deıdi sala mamandary.
«Gaz - ol úlken resýrs. Baǵaly resýrs. Ony óndirý, geologıalyq barlaý jasaý jáne de tasymaldap, tutynýshylarymyzǵa ákelý óte úlken, qıyn jumys. Jáne de qymbat jumys. Sondyqtan qymbat resýrsty únemdep, energetıkalyq qaýipsizdigimizdi arttyrýǵa barlyq tutynýshylarymyzdy shaqyramyn», - deıdi «QazaqGaz» UK AQ Tóraǵasy Sanjar Jarkeshov.
Bıylǵy jylytý maýsymy resmı túrde 27 sáýirde aıaqtalǵan. Al keler maýsymǵa daıyndyq odan buryn bastalyp ketti. Mamandar aqaý shyqqan gaz qondyrǵylary men qubyrlardyń tehnıkalyq tekserisine kirisken. Qazir olardy jańǵyrtyp, aýystyrý boıynsha jumystardy júrgizip jatyr.
«Gaz qondyrǵylarynyń tehnıkalyq qyzmet kórsetý jumystary bastaldy. Tolyqtaı aıaqtalýyna shilde aıynyń ortasy dep otyrmyz. Jylytý maýsymyna daıyqdyq tolyqtaı 1 qyrkúıekke deıin aıaqtalady. Jáne jylytý maýsymyna daıyndyq pasporty ázirlenip, daıyn bolýy shart», - deıdi «QazTransGazAımaq» AQ Astana óndiristik fılıaly dırektorynyń orynbasary Erjan Balabekov.
Mamandar jeke turǵyn úıler de aldaǵy qys maýsymyna daıyndyqty osy kezden bastaǵan jón deıdi. Jylý eki arada joǵalyp ketpes úshin úıdiń qasbetin, shatyry men edenin qalyńdatqan abzal. Osylaısha jylý júıesine salmaq túsirmeı, gazdy meılinshe únemdeýge bolatyn kórinedi.