Almaty ákimdigi apatty aǵashtardy tekserý jáne kesý máselesin túsindirdi, dep habarlaıdy Almaty-akshamy.kz
Túgendeý men jasyl jelekter tizilimine sáıkes Almaty aýmaǵynda 4 mıllıonnan astam aǵash ósedi. Bul rette 84 myńnan astam apatty aǵash bar, onyń 35 myńy kóshe boıynda, 49 myńy aýlada. Bul týraly qalalyq ekologıa jáne qorshaǵan orta Basqarmasynyń jasyl qordy basqarý jáne monıtorıń bóliminiń basshysy Nurlan Quttybaev baspasóz týrynda aıtty.
2022 jyly qalada apatty aǵashtardy kesýdiń bes jyldyq jospary bekitildi. Jospar boıynsha 2022 jyly magıstraldyq joldar boıynda, saıabaq aımaqtarynda jáne aýlaishilik aýmaqtarda 6 myń apatty aǵash kesilip, kesilgen aǵashtardyń ornyna 68 myń kóshet otyrǵyzyldy.
«Bıyl basqarma 16 925 myń dana apatty aǵashtardy kesýdi josparlap otyr jáne kesilgen aǵashtardyń ornyna 169 250 myń kóshet otyrǵyzýdy josparlap otyr», - dedi ol.
Búgingi kúni kestege sáıkes jalpy paıdalanymdaǵy jerlerdegi apatty aǵashtardy kesý jumystary bastaldy. 33 brıgada tartylǵan, barlyǵy 180-den astam adam jumys isteıdi. Jumys bastalar aldynda jaqyn mańdaǵy úılerdiń turǵyndary qulaǵdar bolady, jol eskertý belgileri ornatylady jáne barlyq qaýipsizdik sharasy saqtalady.
J. Jıembaev atyndaǵy Qazaq ósimdik qorǵaý jáne karantın ǴZI ǵylymı qyzmetkerlerin tarta otyryp, apatty aǵashtardy kesý jónindegi jumysty bastamas buryn ekologıalyq máselelerdi sheshý úshin Botanıka jáne fıtoıntrodýksıa ınstıtýty jáne ekobelsendiler apatty aǵashty muqıat tekseredi.
«Aǵashtyń saý nemese apatty jaǵdaıda ekenin kózben kórip anyqtaý árkez múmkin emes. Sondyqtan aǵashtyń ózeginde nemese tamyrynda shiriktiń bolýyn anyqtaýǵa múmkindik beretin arnaıy qurylǵy burǵy bar. Qalalardaǵy jasyl keńistiktiń jasy tabıǵatqa qaraǵanda tómen. Óıtkeni qalada aǵashtar aýyr metaldardy sińiredi jáne ártúrli mehanıkalyq zaqymǵa ushyraıdy. Qatty jelder men basqa da aýa-raıynyń qolaısyzdyǵy kezinde aýrý aǵashtar qulap, ǵımarattarǵa, qurylystarǵa zıan keltirýi, sonymen qatar, adam shyǵynyna ákelýi múmkin», - dedi J. Jıembaev atyndaǵy Qazaq ósimdik qorǵaý jáne karantın ǴZI bıologıalyq qorǵaý bóliminiń meńgerýshisi Nurjan Muhamadıev.
Buǵan qosa, ár aýdanda qoǵam qaıratkerleri men jasyl jelekke beı-jaı qaramaıtyn azamattardyń ózderiniń «Jasyl komısıasy» quryldy. Almaly aýdany boıynsha «Jasyl komısıanyń» basshysy Omar Nurhaıdarov uıym basqarma tarapynan aǵash kesýge jáne aýdan ákimdigi tarapynan butaqty sanıtarlyq kesýge qoǵamdyq baqylaýdy júzege asyratynyn habarlady.
«Ózderińiz bilesizder, qazir qalada qýraǵan jáne apatty aǵashtardy kesý júrip jatyr, bizdiń ekobelsendiler ekologıa basqarmasynyń qyzmetkerlerimen birge kósheler men aýlalardy aralap, qulaǵan apatty aǵashtardyń tizimdeıdi. Bizdiń tizimdegi aǵashtardyń deni qýraǵan, keıde erekshe jaıt (syrtqy jasyl aǵash jáne ishki ózegi shirigen kezde) kezdesedi», - dedi qoǵam qaıratkeri.
Mysal retinde ol syrtqy jasyl, biraq tamyr jaǵy qýys, shirigen ózegi qaraǵashty kórsetti. Aǵash balalar oıyn alańynyń janynda ósip tur.
«Aǵash qaýip tóndiredi, biz ony kesý týraly sheshim qabyldadyq. Bizdiń aýdandaǵy apatty, biraq jasyl aǵashtar árkez jasyl komısıa mamandary jáne músheleri talqylaǵannan keıin ári olardyń kelisiminen soń kesiledi. Bul aýdan ákimdigi men ekologıa basqarmasynyń qoǵamdyq baqylaý úshin ashyqtyq pen qoljetimdilikke degen talpynysyn kórsetedi», - dedi Omar Nurhaıdarov.
