Aıyrqalpaq baýyrlar qyrǵyz tiliniń mártebesin kótermek.
Qyrǵyz Respýblıkasynyń Prezıdenti Sadyr Japarov «Qyrǵyz Respýblıkasynyń memlekettik tili týraly» Qyrǵyz Respýblıkasynyń Konstıtýsıalyq Zańyna qol qoıdy, dep habarlaıdy Almaty-akshamy.kz Egemen.kz-ke silteme jasap.
Zań Qyrǵyz Respýblıkasynyń Joǵarǵy Keńesimen 2023 jylǵy 31 mamyrda qabyldandy.
«Qyrǵyz Respýblıkasynyń memlekettik tili týraly» Qyrǵyz Respýblıkasynyń konstıtýsıalyq zańy Qyrǵyz Respýblıkasy Konstıtýsıasynyń 13-babyn iske asyrý maqsatynda qabyldandy, oǵan sáıkes Qyrǵyz tili — Qyrǵyz Respýblıkasynyń memlekettik tili jáne memlekettik tildi qoldaný tártibi Konstıtýsıalyq zańmen aıqyndalady», delingen Qyrǵyzstan prezıdentiniń resmı habarlamasynda.
Memlekettik til týraly jańa zańnama Qyrǵyz Respýblıkasynyń azamattaryna, Qyrǵyz Respýblıkasynda turaqty turatyn shetel azamattaryna jáne azamattyǵy joq adamdarǵa — barlyǵyna birdeı qoldanylady.
Qyrǵyz tili mindetti túrde qoldanylatyn salalar da bekitildi:
- memlekettik organdardyń, jergilikti ózin-ózi basqarý organdarynyń, kásiporyndardyń, mekemelerdiń jáne barlyq menshik nysanyndaǵy uıymdardyń qyzmetinde;
- saılaý men referendýmdardy daıyndaý jáne ótkizý prosesinde;
- sot isin júrgizýde, Qarýly Kúshterde, Qyrǵyz Respýblıkasynyń Quqyq qorǵaý organdarynda;
- Qyrǵyz Respýblıkasy qatysýshysy bolyp tabylatyn halyqaralyq sharttardy jasasý kezinde jáne t.b.
Sonymen qatar 32-bapta memlekettik tildi meńgerýge jáne ony qyzmettik mindetterin atqarý kezinde paıdalanýǵa mindetti adamdardyń tizbesi aıqyndalǵan. Olardyń qataryna memlekettik jáne mýnısıpaldy qyzmetkerler, Qyrǵyz Respýblıkasynyń Jogorký Kenesh depýtattary, jergilikti Kenesh depýtattary, Qyrǵyz Respýblıkasy Ulttyq Bankiniń qyzmetshileri, ishki ister organdary men basqa da quqyq qorǵaý organdarynyń ofıserlik jáne basshy (orta jáne joǵary) quramynyń adamdary, sot tóreshileri, prokýrorlar, qorǵaýshylar, notarıýstar jáne t.b. jatady.