Balalary qazaq tilin umytpasyn dep Londonda qazaq tili synybyn ashqan ana
Taıaýda Londonda otandasymyz Ásel Moldaǵalıeva qazaq tili synybyn ashty, dep habarlaıdy Almaty-akshamy.kz
Almaty.tv saıtynyń aqparatyna súıensek, balalary ana tilinde aǵylshynsha aksentpen sóıleı bastaǵanyn baıqaǵan Ásel dereý qazaq tili synybyn ashýdy uıǵarǵan.
Áseldiń mamandyǵy - esepshi. Degenmen, muǵalimniń jumysyn bir kisideı biledi. Óıtkeni jańa ortaǵa túsken kezde tórt balasynyń oqý úlgerimin joǵarylatý úshin qolynan kelgenniń barlyǵyn jasaǵan. Ýaqyt óte kele, balalarynyń qazaq tilinde aǵylshyn aksentimen sóıleıtinin baıqaǵan ana osynyń aldyn alýdy jón sanaıdy. Keıinnen balalary tolyǵymen qazaqsha sóıleýdiń ornyna arasyna úsh-tórt tildi qosyp sóıleıtindi shyǵarǵan.
Áseldiń aıtýynsha, muny túsinýge bolady, sebebi jańa til úırenip júrgen balanyń sóz arasynda sol tildegi sózderdi avtomatty túrde aıtyp qalatyny belgili. Qazir balalarynyń biri nemis, biri fransýz tilin oqyp júr eken. Kóp til bilsin desek te, qazaq tilin umytpasyn, aksentpen sóılemesin degen maqsatpen Ásel qazaq tili synybyn ashýdy qolǵa alypty.
«Jalpy, mamyr aıynda osyndaı ıdeıa týyndaǵan soń, eń aldymen sabaq ótkizetin oryn izdeı bastadym. Ol oryn jaı ǵana kabınet nemese shaǵyn kafe bolmaýy tıis ekenin áý bastan túsindim. Sebebi balalar ondaı jerlerde oqı almaıdy, olar mekteptiń atmosferasyn sezinýi kerek. Mektep atmosferasyn sezine alǵan bala úshin oqýda kóp qıyndyq bolmaıdy. Sondyqtan birden mektep izdestirdim. Osynda ornalasqan A* Russian School memlekettik mektebiniń dırektorymen kezdesip, óz ıdeıamdy ortaǵa salyp, usynys bildirdim. Ol kisi birden qoldap, senbi jáne jeksenbi kúnderi mektep kabınetterin jalǵa beretin bolyp kelisti. Sóıtip, qyrkúıek aıynyń ortasynan bastap, sabaq júrgizýdi bastap kettik», - deıdi Ásel Moldaǵalıeva.
Qazir on jeti bala oqıdy, olar úsh topqa bólinip oqyp jatyr. Sabaqqa qajetti oqýlyqtardy Qazaqstannan aldyrtqan. Búginde Londondaǵy balalardyń qazaq tilin bilý deńgeıleri ártúrli. Olardyń belsendiligin arttyrý úshin Áseldiń til úıretý mektebi jumys istep jatqan kórinedi