Ulttyq bank tóraǵasynyń orynbasary Álıa Moldabekova valúta naryǵyndaǵy sońǵy jaǵdaılarǵa túsinikteme berdi, dep habarlaıdy aqshamnews.kz
«Qazirgi ýaqytta biz jahandyq qarjy naryqtary tym qatty qubylyp turǵanyn baıqap otyrmyz. Buǵan, álbette, AQSH-taǵy prezıdent saılaýynyń nátıjesi aıtarlyqtaı yqpal etti. D.Tramptyń jeńisi AQSH dollaryn kúsheıtip, damýshy elderdiń valútalary, sonyń ishinde teńge de álsiredi. Negizgi álemdik valútalarǵa shaqqandaǵy dollar baǵamyn kórsetetin DXY ındeksi qyrkúıek aıynyń sońynda 100,8 tarmaqta tómen mánge jetkennen keıin 5%-ǵa deıin nyǵaıyp, 105,5 tarmaqqa deıin ósti. EM valútalarynyń ındeksi qyrkúıek aıynyń sońynan 4,2%-ǵa tómendedi (11 qarashadaǵy jaǵdaı boıynsha). Onyń ústine, munaı kotırovkalary da qalypty túrde tómendep, 1 barreli 74-75 AQSH dollarynan 71,83 AQSH dollaryna deıin tústi (2024 jylǵy 11 qarashadaǵy jaǵdaı boıynsha). Sebebi áleýetti saýda bajdary men D.Tramptyń prezıdenttik kezeńinde AQSH-tan kóptep munaı jetkizýdiń ózi shamadan tys artyq usynysqa ákeledi degen ekonomıserdiń boljamy áser etti. Onyń ústine, qýatty dollar – qashanda shıkizat taýarlary úshin negatıvti faktor sanalady», - dedi Álıa Moldabekova.
Onyń aıtýynsha, syrtqy naryqtardaǵy qubylmaly jaǵdaı valúta naryǵyna qatysýshylardyń qımyl-áreketine de áser etedi. Biz shetel valútasyna usynys aıtarlyqtaı tómendep, oǵan degen suranystyń bir mezgilde óskenin baıqap otyrmyz. Bul óz kezeginde teńge baǵamynyń álsireýine yqpal etedi. 2024 jylǵy qarashanyń basynan beri ulttyq valútanyń bırjalyq saýda-sattyqtaǵy baǵamy 1,4%-ǵa álsirep, 1 AQSH dollary úshin 495 teńgege jetti.
«Ókinishke qaraı, spekýlátıvtik sıpattaǵy mámilelerdiń kóbeıgeni de baıqalyp otyr. Bul da aıyrbas baǵamyn tym qubyltyp jiberedi. Ótimdilik jetkiliksiz jaǵdaıda bul – baǵamnyń aıtarlyqtaı aýytqýyna ákelýi múmkin. Biz buǵan deıin málimdegenimizdeı, Ulttyq bank ulttyq valúta baǵamyna tán ózgeristerge mán bere qoımaıdy. Óıtkeni munyń barlyǵy fýndamentaldy faktorlarmen dáıektelgen. Alaıda, sońǵy kúnderdegi teńgeniń qubylýyna – tek qana fýndamentaldy faktorlar yqpal etpeı otyrǵanyn aıtýǵa májbúrmiz. Osyǵan baılanysty Ulttyq bank ulttyq valútanyń qubylý shamasyn – shamadan tys dep baǵalaıdy- dep tolyqtyrdy Ulttyq bank ókili.
Ulttyq bank ishki valúta naryǵyndaǵy jaǵdaıdy qadaǵalap otyr. Aǵymdaǵy úrdister, ásirese, spekýlátıvti kóńil-kúı saqtalǵan jaǵdaıda, ádil baǵam qalyptastyrýdy qalpyna keltirý úshin jáne ulttyq valúta baǵamynyń kúrt ózgerýine jol bermeý úshin Ulttyq bank jedel áreket etip, valútalyq ıntervensıa júrgizýge daıyn.