2024 jyldyń 5 qarashasynda Almaty qalasy Bilim basqarmasyna qarasty KMQK «№84 bóbekjaı-balabaqsha» bazasynda «Mektepke deıingi tárbıe men oqytý uıymdaryndaǵy jobalyq qyzmet» taqyrybynda respýblıkalyq ǵylymı-ádistemelik konferensıa ótti. Bul is-shara Almaty qalasy ákimdigi men bilim basqarmasynyń qoldaýymen uıymdastyryldy, dep habarlaıdy aqshamnews.kz
2023 jyldyń shilde aıynda Jaısanbaeva Akerke Sagnyshovna, Almaty qalasyndaǵy balabaqsha meńgerýshisi, Sıngapýr elinde taǵylymdamadan ótip, osy eldiń balabaqshalarynda qoldanylatyn ekologıalyq ádister men qural-jabdyqtardy óz isinde paıdalaný tájirıbesin meńgerip qaıtty. Sıngapýrlyq tájirıbede qaldyq materıaldardan kómekshi quraldar men ásem bezendirýler jasaý keńinen qoldanylatyny belgili. Bul tájirıbeni óz jumysynda qoldaný úshin Akerke Sagnyshovna «Tabıǵat jáne biz» atty jobany ázirlep, balabaqshada qaldyq zattarǵa ekinshi ómir syılaý taqyrybyn qolǵa aldy.
Sonymen qatar, jobanyń aıasynda balabaqsha qabyrǵalary qazaqsha sóılep, balalardyń shyǵarmashylyq qabiletterin damytý úshin arnaıy oıyn ortalyqtary uıymdastyryldy. Bul joba mektepke deıingi bilim berý salasynda ekologıalyq tárbıe berý boıynsha ozyq tájirıbelerdi kórsetý maqsatynda júzege asyryldy.
Konferensıanyń basty maqsaty — mektepke deıingi bilim berý salasyndaǵy ekologıalyq tárbıe boıynsha jobalyq qyzmettiń ozyq tájirıbelerin kórsetý, tájirıbe almasý jáne pedagogıkalyq qaýymdastyqta ekologıalyq tárbıe máselelerin talqylaý boldy. Konferensıa barysynda qatysýshylarǵa ınovasıalyq ádister men tehnologıalar usynylyp, teorıalyq jáne praktıkalyq turǵyda bilim men daǵdylar berildi.
Konferensıanyń baǵdarlamasy mynadaı sharalardan turdy:
- Qaldyq zattarǵa ekinshi ómir syılaý taqyrybynda joba prezentasıasy;
- Tárbıelenýshilermen uıymdastyrylǵan is-áreket;
- Sheberlik synyptary;
- Balabaqsha ishinde «Qabyrǵalar sóıleıdi» ortalyqtaryna ekskýrsıa;
- Jobalyq qyzmetti uıymdastyrý boıynsha pikir almasý;
- Pedagogtardyń ózara tájirıbe almasýy.
Konferensıaǵa Balalardy erte damytý ınstıtýtynyń ókilderi, Qyzylorda oblysynyń Qarmaqshy aýdany bilim bóliminiń bas mamany Hatıra Arýbaevna Almaganbetova, sondaı-aq Astana, Ulytaý oblysy, Túrkistan oblysy mektepke deıingi uıymdarynyń basshylary qatysty. İs-sharaǵa mektepke deıingi uıymdardyń tárbıeshileri, ádiskerler jáne sala mamandary da shaqyryldy.
Konferensıa barysynda qatysýshylar qaldyq zattardy kómekshi qural retinde qoldanýdyń zamanaýı tásilderi men jobalyq qyzmet salasyndaǵy jańa múmkindikterdi talqylady, bul shara qatysýshylar úshin mańyzdy ári mazmundy boldy.