Syrtqy ister mınıstrliginiń resmı ókili Aıbek Smadıarov 3 maýsymda ótken brıfıń barysynda Parıjge jazǵy Olımpıada oıyndaryna barýdy josparlap otyrǵan qazaqstandyqtarǵa óz usynystaryn aıtty, dep habarlaıdy almaty-akshamy.kz.
QR SİM resmı ókili Olımpıadany tamashalaý úshin qansha qazaqstandyq Parıjge attanǵaly otyrǵanyn aıta almaıtynyn atap ótti.
"Tek, Olımpıadaǵa baratyn azamattarymyzǵa usynystar aıta alamyz. Adamdar kóp jınalatyn bolǵandyqtan, jergilikti bılik qaýipsizdik sharalaryn meıilinshe kúsheıtedi. Olardyń talaptaryn múltiksiz oryndaý qajet bolady. Siz ózińizdiń qaýipsizdigińiz týraly oılanýyńyz kerek. Kez-kelgen fors-major jaǵdaıda dereý Parıjdegi elshiligimizge habarlasýlaryńyz kerek. Biz Sizderge kómektesemiz", – dedi Aıbek Smadıarov.
Parıjdegi jazǵy Olımpıada oıyndary 26 shilde men 11 tamyz aralyǵynda ótedi. Oǵan álemniń 205 elinen 10 myńnan astam sportshy qatysady, sondaı-aq 32 sport túrinen 329 medal jıyntyǵy oınatylady.