Sybaılas jemqorlyqqa qarsy sanany qalyptastyrý qoǵamdaǵy paraqorlyqty joıý jolyndaǵy mańyzdy qadam bolyp tabylady.
Bul týraly ÓKQ alańynda ótken brıfıńte QR Sybaılas jemqorlyqqa qarsy is-qımyl Agenttiginiń Almaty qalasy boıynsha departamentiniń basshysy Arman Rahımov málimdedi, dep habarlaıdy Almaty-akshamy.kz.
Jobanyń maqsaty – azamattardy, qoǵamdyq birlestikterdi, kásipkerlik sýbektileri men kvazımemlekettik sektorlardy, sondaı-aq basqa da uıymdardy sybaılas jemqorlyqqa qarsy is-sharalarǵa volonter retinde tartý.
«2023 jyldyń tamyz aıynan bastap «Sybaılas jemqorlyqqa qarsy volonterlik» jobasy sátti júzege asyrylýda, oǵan Almaty qalasynda 260-tan astam azamat qosyldy», - dedi Arman Rahımov.
ÓKQ spıkeri qysqa merzimde belgili nátıjelerge qol jetkizilgenin atap ótti. Osylaısha, memlekettik satyp alý monıtorıńi barysynda 312 mıllıon teńgeden astam búdjet qarajatyn únemdeýge qol jetkizdi.
Balalar oıyn alańdaryna, salynyp jatqan nysandarǵa, asfáltbeton tósenishteri men basqa da áleýmettik nysandarǵa monıtorıń júrgizildi.
Memlekettik satyp alý monıtorıńiniń qorytyndysy boıynsha aýdan ákimdigimen jalpy quny 1,3 mlrd teńgeni quraıtyn «240 aýla aýmaqtaryna jóndeý júrgizý» týraly habarlandyrý jarıalanǵany anyqtaldy. Kelisimshartty tekserý kezinde qyzmet aqysy tolyq kólemde tólengeni anyqtaldy. Alaıda, volonterlik top kóshpeli monıtorıń júrgizý barysynda sporttyq qural-jabdyqtardyń jetkiliksizdigi (átkenshek, basketbol qalqandary, kóshe trenajerleri), oryndyqtardyń, qoqys jáshikteri men syrtqy jaryqtandyrý qurylǵylarynyń joqtyǵy sekildi t.b. buzýshylyqtardy anyqtady. Atalǵan fakti boıynsha aýdan ákimdigine hat joldanyp, nátıjesinde kemshilikter joıyldy.
Sybaılas jemqorlyqtyń aldyn alý boıynsha jumys qoǵam qaıratkerlerimen, úkimettik emes uıymdardyń, azamattyq alánstardyń ókilderimen, bıznes belsendilerimen jáne jastar qozǵalysynyń jetekshilerimen tyǵyz baılanysta júrgiziledi.
«Jyl basynan beri sybaılas jemqorlyqqa qarsy mádenıetti qalyptastyrý aıasynda túrli formattaǵy 50 is-shara ótkizildi, oǵan 3 myńnan astam adam qatysty», - dedi A. Rahımov.
Ol sóz sońynda, qoǵam sybaılas jemqorlyq táýekelderine syrtqy taldaý júrgizýge, sybaılas jemqorlyqpen kúresýge baǵyttalǵan túrli is-sharalardy uıymdastyrýǵa, ózekti máselelerdi talqylaýǵa qatysatynyn atap ótti.