Sybaılas jemqorlyqqa qarsy qyzmet 55 mlrd teńge somasyna búdjet qarajatynyń negizsiz jumsalýynyń aldyn aldy
Sybaılas jemqorlyqqa qarsy qyzmet Atameken UKP «Biryńǵaı satyp alý terezesi» aqparattyq júıesi arqyly satyp alynatyn taýarlardyń, jumystar men kórsetiletin qyzmetterdiń josparly baǵalaryn kóterý turǵysynan memlekettik satyp alý men kvazımemlekettik sektordyń satyp alýlaryna monıtorıń júrgizý boıynsha jobany iske asyrýda, dep habarlaıdy aqshamnews.kz
2024 jyldyń qorytyndysy boıynsha 55,1 mlrd teńge somaǵa artyq ósýdiń aldyn alyndy, onyń jartysy – 26 mlrd teńge (nemese 47%) búdjetke qaıtaryldy. Qalǵan somany tapsyrys berýshiler qaıta qarady. Josparly baǵa tómendedi nemese osy aqsha sheńberinde satyp alynatyn taýar sany ulǵaıdy. Máselen, SQO-da 230 mln teńgeniń zańsyz jumsalýyna jol berilmedi. Agenttik Petropavlda teledıdar munarasyna arnalǵan jaryqdıodty jabdyqty montajdaý boıynsha jumystardy satyp alý tótenshe jaǵdaımen baılanysty bolmasa da, tótenshe jaǵdaılardy joıý syltaýymen júrgizilgenin anyqtady. Nátıjesinde shart buzylyp, búdjet qarajaty qaıtaryldy.
Qaraǵandy oblysynda mamandandyrylǵan mýzykalyq mektep-ınternat 9 mln teńgege 18 myń bótelke as sirke sýyn satyp alýdy josparlaǵan, bul mekemeniń qajettiliginen edáýir asyp túsedi (barlyǵy 460 adam). Sonymen qatar, bir bótelkeniń baǵasy 300 teńge naryqtyq qunynan 500 teńgege deıin kóterilgen, bul shyǵyndardy 3,5 mln teńgege arttyrdy. Bizdiń aralasýymyzdan keıin satyp alý toqtatyldy, al búdjet shyǵyny 9 mln teńgege únemdeldi.
Sol sıaqty, Qyzylorda oblysynda Oblystyq fılarmonıa 300 qabyrǵa sýretin ortasha naryqtyq baǵasy bir birligine 20 myń teńge bola tura 48 mln teńgege (bir kartınaǵa 160 myń teńgeden) satyp alýdy josparlaǵan. Qunnyń artýy 42 mln teńgeni qurady. Antıkordyń usynysynan keıin satyp alý toqtatylyp, qarajat búdjetke qaıtaryldy. Sybaılas jemqorlyqqa qarsy qyzmet memlekettik satyp alý salasyndaǵy zańdylyq pen tártipti qamtamasyz etý boıynsha jumysty jalǵastyrýda.