QR Eńbek jáne halyqty áleýmettik qorǵaý mınıstri Svetlana Jaqypova Úkimet otyrysynda qaýipsiz eńbek jaǵdaılaryn qamtamasyz etý jáne eńbek salasyn sıfrlandyrý boıynsha júrgizilip jatqan jumystar týraly aıtty.
Mınıstrdiń málimetinshe, 2024 jyly óndiristik jaraqattardan 1408 adam zardap shegip, 202 adam kóz jumǵan. Qazirgi tańda 445 myńnan astam jumys orny zıandy nemese qaýipti dep tanylǵan. Bul – eńbek qaýipsizdigin arttyrýdyń ózektiligin aıqyn kórsetedi, dep habarlaıdy aqshamnews.kz.
Eńbek mınıstrligi eńbek salasyn jaqsartý boıynsha 10 negizgi baǵytta jumys júrgizip otyr:
• óndiristik táýekelderdi avtomatty túrde baǵalaıtyn Eńbek táýekelderiniń kartasyn engizý;
• eńbek jaǵdaılaryn úzdiksiz sıfrlyq baqylaýǵa kóshý;
• óndiriste zardap shekkenderge áleýmettik qoldaý júıesin jetildirý;
• zıandy eńbekke tartylǵan qyzmetkerlerge arnaıy tólemder men kepildikter usyný;
• ujymdyq sharttardy elektrondy formatqa kóshirý;
• kásipodaqtardyń jedel baqylaý quraldaryn engizý;
• kásiporyndar úshin eńbek qaýipsizdiginiń sıfrlyq beıinin jasaý;
• memlekettik baqylaý tetikterin jetildirý;
• retteýshi kedergilerdi azaıtý;
• Halyqaralyq eńbek uıymymen yntymaqtastyqty keńeıtý.
Svetlana Jaqypova Qazaqstanda Halyqaralyq eńbek uıymynyń jobalyq keńsesin ashý josparlanyp jatqanyn da habarlady.
«Maqsat – ádil, tıimdi jáne zamanaýı eńbek qaýipsizdigi júıesin qalyptastyrý», – dedi mınıstr.