Aýyl balalaryna da Eýropanyń ataqty fýtbol klýbtarynda óner kórsetý múmindigi týdy.
«Qazaqstan» teleradıokorporasıasynyń «Qazsport» telearnasynan «Super bol!» jobasy efırge shyǵady. Maqsaty - teńbil dopty shyr úıiretin sheberlerdi anyqtaý. Keshe Semeıde, al búgin Pavlodarda 16-25 jas aralyǵyndaǵy darabozdar kastıngten ótti, dep habarlaıdy Almaty-akshamy.kz Qazaqstan.tv saıtyna silteme jasap.
Jeńimpazdar «Qazsport» telearnasynda tikeleı júrgiziletin realıtı-shoýǵa qatysady.
Serikbol ózin otandyq klýbtarda oınap júrgen fýtbolshylardan kem kórmeıdi. Jasyl alańdaǵy aıshyqty qımylymen júzdegen stýdent úlgi tutar tulǵaǵa da aınaldy. Oqýyn bitirip, mamandyq ıesi atanǵan soń, endi kásibı fýtbolda baǵyn synap kórmek.
"Bul jerde eshqandaı tanystyq róli oınamaıdy dep oılaımyn. Sebebi kez kelgen bala tirkelýge kelgen kezde, ol tanysy, tanysy emes, qandaı nomer alatyny belgisiz. Sondyqtan bul joba - keremet múmkindik. Sýperlerdiń arasynda sýper bolýǵa tyrysamyz. Men 100 paıyz daıynmyn!" - dedi «Super bol!» jobasyna qatysýshy Serikbol Naqysbek.
«Super bol!» jobasyna teńbil doptyń sońyna túsken 130-ǵa tarta úmitker keldi. Olar osy jerde top-topqa bólinip sheberlikterin synaıdy. Myqtylardy alty skaýt anyqtaıdy.
Jobanyń hedlaınerleri - Davıd Lorıa men Samat Smaqov. Ekeýi de «Ertis» fýtbol klýbynda uzaq jyl óner kórsetip, jankúıer súıiktisine aınalǵan.
"Naǵyz myqtylar aýyldan shyǵady. Biraq kóbi sol jaqta qalyp qoıady. Bizdiń jobanyń maqsaty - solardy anyqtap, baptap, úlken oıyndarǵa salý. Árıne, qalalyq jerlerdegi jastar da qatysady. Búgin úmitkerlerdiń qaırat jigerlerin sarp etip barynsha synaıtyn bolamyz", - dedi «Super bol!» jobasynyń bas menedjeri Davıd Lorıa.
Kastıng maýsymnyń aıaǵyna deıin elimizdiń 8 qalasynda ótkiziledi. 150 oıynshy iriktelip, olar Almatyda synalady. Ol jerde 50 úmitker qalyp, eki aı boıy ulttyq qurama jattyǵatyn Talǵardaǵy bazada «Qazsport» telearnasynda tikeleı júrgiziletin realıtı-shoýǵa qatysady.
"Sońǵy oıyn bolady, fınaldyq oıyn. Ol oıynda Eýropanyń klýbtarynyń, osy Qazaqstan klýbtarynyń skaýdteri deımiz ǵoı, seleksıa jasaıtyn adamdary kelip kóredi. Ózderine unaǵan oıynshylardy kelisimshartqa alatyn bolady. Eń bastysy, osy oıynshylarǵa múmkindik berý", - dedi «Super bol!» jobasynyń kreatıvtik prodúseri Aıdyn Qojahmet.
Joba tamyzdyń sońynda qorytyndylanady. Eń myqty 22 úmitker anyqtalyp, olar kásibı klýbtardyń birimen kezdesý ótkizedi. İle sheteldiń ataqty klýbtaryna tálim alýǵa jiberiledi.