Qaıratkerge arnalǵan músin Qojanov pen Jarokov kósheleriniń qıylysyna qoıylǵan.
Almatyda Táýelsizdiktiń 30 jyldyǵy qarsańynda ǵalym, pýblısıs Sultanbek Qojanovqa ornatylǵan bústtiń ashylý rásimi ótti, dep habarlaıdy Almaty-akshamy.kz
Saltanatty sharaǵa tarıhı tulǵanyń týystary, zıaly qaýym ókilderi qatysty.
«Ol Qazaq eli táýelsizdiginiń bastaýynda turǵan tulǵalardyń biri. Ol – Álıhan Bókeıhannyń, Ahmet Baıtursynulynyń, Mirjaqyp Dýlatulynyń izin basqan, solarmen tyǵyz qarym-qatynasta bolǵan. Alash qaıratkerlerimen aralasqan, óz qaıyrymyn tıgizgen tanymal tulǵa», – dedi fılologıa ǵylymdarynyń doktory Amantaı Shárip.
Memleket jáne qoǵam qaıratkeri, ustaz, ǵalym, pýblısıs Qojanov Sultanbek 1894 jyly Ońtústik Qazaqstan oblysy, Sozaq aýdany, Aqsúmbe aýylynda týǵan. Saıası qyzmetin Tashkent qalasynda semınarıa oqýshylarynan qurylǵan «Keńes» atty astyrtyn jastar uıymyn qurýdan bastaǵan.
1917 jyly kóktemde Tashkentte Mustafa Shoqaı, Q.Qojyqov, Q.Bolǵanbaev, S.Aqaevpen birge «Birlik týy» gazetin shyǵardy. Ólkede keńestik bılik tusynda bolǵan asharshylyqqa qarsy kúreste belsendilik tanytty. S.Qojanov 1920-1924 jyldary Túrkistan kompartıasy OK múshesi, Túrkistan ortalyq atqarý komıteti tóraǵasynyń orynbasary, Túrkistan respýblıkasynyń ishki ister halyq komısary, Halyq aǵartý halyq komısary, «Aqjol» gazetiniń redaktory bolady. 1924-1925 jyldary Qazaq ólkelik partıa komıtetiniń hatshysy, 1925-1926 jyldary BK/b/P OK ult respýblıkalary men oblystary boıynsha jaýapty nusqaýshysy, Máskeý marksızm-lenınızm kýrsynyń tyńdaýshysy, 1928 jyly BK/b/P OK Orta Azıa búrosynyń úgit-nasıhat bólimi meńgerýshisiniń orynbasary, 1929-1931 jyldary Orta Azıa maqta-ırrıgasıa polıtehnıkalyq ınstıtýtynyń alǵashqy dırektory, 1931-1932 jyldary Orta Azıa maqta ortalyǵy basqarmasynyń tóraǵasy, 1932-1933 jyldary Máskeýde Odaqtyq maqta ónimderi basqarmasynyń orynbasary, 1933-1934 jyldary KSRO HKS maqta toby basshysynyń orynbasary, 1934 jyly keńestik baqylaý komısıasynyń Ózbekstan boıynsha ókili bolyp qyzmet atqarady.
Onyń shyǵarmashylyǵynda «Neni aıtaıyn?», «Kim jaýapker?», «Kóremiz!», «Shynǵa uqsaǵan pikirler», «Bul kim?», «Tilmashtarǵa bir syn» t.b. óleńderi men K.Balmont, Ezop (D.Bednyı tárjimesi) týyndylarynan qazaqsha sóıletken aýdarmalary bar.
Qaıratker 1937 jyly 16 shildede ustalyp, 1938 jyly 8 aqpanda atylǵan.