37 jastaǵy almatylyq azamat óz-ózine qol jumsap, ómirimen qoshtaspaq boldy.
Óz-ózine qol jumsamaq bolǵan azamatty Almaly aýdanynyń ýchaskelik ınspektorlary aman alyp qaldy, dep habarlaıdy Almaty-akshamy.kz.
«Saǵat 17:00 shamasynda “102” púltine TÚ biriniń 11-qabatyndaǵy terezede er adamnyń otyrǵany jáne óz-ózine qol jumsaǵysy keletini týraly habarlama kelip tústi. Osyndaı habardy alǵannan keıin, seriktesim, polısıa qyzmetkeri Azamat Dúısenbek ekeýmiz atalǵan úıge jettik. Osy kezde “Býran-052” patrúldik ekıpajy da keldi. Abyroı bolǵanda páterdiń esigi qulyptalmaǵan: terezede otyrǵan adamdy shoshytyp almas úshin syrtqy esikti bildirmeı ashtyq. Men baıqatpaı kirdim, ony ustap alyp, bólmege qaraı súıredim. Óz-ózine qol jumsamaq bolǵan azamattyń jasy – 37-de. Onyń jaǵdaıy nashar boldy. Ol óz áreketiniń sebebi týraly naqty eshteńe aıtpady. Medısınalyq jáne psıhologıalyq kómek kórsetý úshin oqıǵa ornyna dárigerler brıgadasy shaqyryldy», – deıdi Almaly aýdandyq PB-nyń ýchaskelik ınspektory Erasyl Buharov.
Qazirgi ýaqytta polıseıler bul iske qatysty tergeý amaldaryn júrgizip jatyr. Oqıǵanyń mán-jaıy anyqtalýda.