Sýdyń «qara naryǵyn» joıý maqsatynda Sý resýrstary jáne ırrıgasıa mınıstrligi sý salasyndaǵy quqyq buzýshylyqtar úshin jaýapkershilikti kúsheıtýge nıetti.
Atap aıtqanda, jańa Sý kodeksinde sýdy paıdalaný men qorǵaýǵa memlekettik baqylaý men qadaǵalaýdy kúsheıtýge baǵyttalǵan mańyzdy ózgertýler qarastyrylyp otyr, dep habarlaıdy Almaty-akshamy.kz.
Jańa Sý kodeksinde ýákiletti vedomstvo men baseındik ınspeksıalarǵa qadaǵalaý fýnksıalary beriledi. Qazirgi ýaqytta baseındik ınspeksıalar Kásipkerlik kodeks aıasynda tekseris júrgizedi. Alaıda, josparlaý, tirkeý jáne habarlaý prosesi uzaqqa sozylýyna baılanysty quqyq buzýshylar jıi jazadan qutylyp ketedi.
Budan bólek, qoldanystaǵy Kásipkerlik kodekske tolyqtyrýlar engizý usynylyp otyr. Bul ózgerister baseındik ınspeksıalar men memlekettik sý ınspektorlarynyń fýnksıalaryn keńeıtedi, memlekettik baqylaý men qadaǵalaý nysandaryn ózgertedi, sondaı-aq jedel den qoıý sharalaryn qabyldaýdyń jańa quraldaryn, sharttary men negizderin engizedi.
«Bul bizdiń negizgi ustanym. Sýdyń «qara naryǵyn» joıý jáne basqa da quqyq buzýshylyqtardyń aldyn alý úshin biz memlekettik baqylaýdy kúsheıtemiz. Eshkim jaýapkershilikten qutylmaıdy. Biz usynǵan jańa normalar men erejeler quqyq buzýshylyqtar sanyn edáýir azaıtýǵa jáne elimizdiń sý resýrstaryna turaqty baqylaýdy qamtamasyz etýge múmkindik beredi», - dedi Sý resýrstary jáne ırrıgasıa mınıstri Nurjan Nurjigitov.