Astana qalasynyń qylmystyq ister jónindegi mamandandyrylǵan aýdanaralyq sotynda Q.Bıshimbaevtyń isin qarap jatqan sýdıa Aıjan Qulbaeva bas sot talqylaýyna qatysýshylarǵa, onyń ishinde jýrnalıserge jeke quqyqtaryn túsindirip, alqabılerdi foto-vıdeoǵa túsirýge tyıym saldy.
"Máselen, BAQ-tyń is-áreketi sot talqylaýynyń qalypty barysyna kedergi keltirmeýi tıis. Osy sebepti buqaralyq aqparat quraldaryna túsindirgim keledi, eger sizdiń sot zalynda bolýyńyz sottyń qalypty jumysyna kedergi keltirse, onda sot sizdi sot zalynan shyǵarýǵa májbúr bolady. Sondaı-aq, siz zańnamanyń talaptaryna sáıkes tóraǵalyq etýshiniń talaptaryna baǵynýyńyz kerek ekenin eskertemin. Budan basqa, alqabılermen prosestik emes baılanystardy boldyrmaý maqsatynda, sondaı-aq is boıynsha úlken qoǵamdyq rezonansty jáne áleýmettik jelilerde translásıany eskere otyryp, eń aldymen buqaralyq aqparat quraldarynyń sot tóreligi múddesinde alqabılerdi sýretke ne vıdeoǵa túsirýge tyıym salynatynyn nazarlaryńyzǵa jetkizgim keledi", - dep atap ótti Aıjan Qulbaeva.
Ol bul talaptar saqtalmaǵan jaǵdaıda jáne áleýmettik jelilerde fotosýret nemese qandaı da bir túsirilim jáne alqabıler túsip qalǵan sot otyrysy vıdeosy anyqtalǵan jaǵdaıda tıisti sharalar qabyldanatynyn eskertti.