Ár túrli ınfeksıalardy juqtyrý qaýpi bar.
Óıtkeni, ondaǵy sýdyń quramyna densaýlyqqa aıtarlyqtaı zıan keltiretin túrli hımıalyq zattar qosylady, dep habarlaıdy Almaty-akshamy.kz
Jazda balalardyń súıikti oıyn-saýyqtarynyń biri – sýburqaqtarda shomylý. Fontandy shomylýǵa arnalǵan oryn retinde eresekter de paıdalanatyn kezder bolady. Mundaı zıansyz ermek óte qaýipti. Másele mynada, qalalyq sýburqaqtardaǵy sý shomylýǵa arnalmaǵan. Onyń quramyna densaýlyqqa aıtarlyqtaı zıan keltiretin túrli hımıalyq zattar qosylady. Ártúrli ınfeksıalardy juqtyrý qaýpi bar. Siz tek juqtyryp qana qoımaı, keıinnen aýrýdy taratýyńyz da yqtımal. Fontanda shomylý jiti ishek ınfeksıasyna, respıratorlyq ınfeksıaǵa ákelýi múmkin, al negizgi qaýip – enterovırýstyq, rotavırýstyq ınfeksıalar, sondaı-aq A vırýstyq gepatıti.
Jyl saıyn jazǵy kezeńde, mamyrdan qyrkúıekke deıingi aılarda, vırýstyq sanıtarlyq-hımıalyq jáne bakterıologıalyq kórsetkishterge sý synamalaryn ala otyryp, sýburqaq keshenderiniń sý sapasyna monıtorıń júrgiziledi.
Búgingi tańda elimizde 643 sýburqaq jumys isteıdi, onyń 318-i (49,4%) zerthanalyq baqylaýmen qamtylǵan. Aǵymdaǵy jylǵy ótken kezeńde vırýsologıalyq kórsetkishterge 197 sý synamasy, bakterıologıalyq kórsetkishterge 76 sý synamasy jáne sanıtarıalyq-hımıalyq kórsetkishterge 47 sý synamasy alyndy. Sáıkes kelmeıtin synamalardyń negizgi kólemi (9,1%) vırýsologıalyq kórsetkishter boıynsha anyqtalǵan.
Zertteý nátıjeleri boıynsha ruqsat etilgen mánderden aýytqýlar Qostanaı jáne Shyǵys Qazaqstan oblystarynda, sondaı-aq Nur-Sultan qalasynda anyqtaldy. Qalǵan óńirlerde zertteletin sý synamalarynyń nátıjeleri normalanatyn kórsetkishter sheginde. Sý monıtorıńiniń nátıjeleri boıynsha sharalar qabyldaý úshin jergilikti atqarýshy organdarǵa, aýmaqtyq polısıa departamentterine, sondaı-aq burqaqtarǵa qyzmet kórsetetin uıymdarǵa usynymhattar joldandy.
«Qurmetti azamattar! Saqtyq sharalaryn saqtaýǵa, sýburqaqtarda shomylýdan aýlaq bolýǵa, ózińizdi jáne jaqyndaryńyzdy ınfeksıa qaýpine ushyratpaýǵa keńes beremiz. Balalaryńyzǵa sýburqaqtarda shomylýdyń qaýiptiligi týraly túsindirińiz», - degen aqparat taratty Sanıtarlyq-epıdemıologıalyq baqylaý komıteti.