Búgingi tańda tasqynnan zardap shekken 16 myńnan astam otbasyna 100 aılyq eseptik kórsetkish kólemindegi birrettik tólem berildi. Onyń jalpy somasy 6 mlrd teńgege jýyqtaıdy.
Óńirlik komısıalarǵa búlingen múlik pen shyǵyndy óteý boıynsha 25 myńǵa jýyq ótinish kelip túsken, dep habarlaıdy Almaty-akshamy.kz 24.kz-ke silteme jasap.
Úkimet baspanasynan aıyrylǵandardy turǵyn úımen qamtýdyń úsh jolyn usynyp otyr. Nysanǵa jóndeý jumystary júrgiziledi, daıyn páter satyp alynady nemese jańa baspana salynady. Eger azamat úıdi ózim salamyn dese, qarjyny bólip berý tetigi qarastyrylǵan. Jańadan salynatyn bir bólmeli páterdiń aýdany 80, eki bólmeli páterdiń aýdany 160 sharshy metr bolady.
«Aýdany 80 sharshy metr úıdiń quny 22 mln shamasynda, eki bólmeli 160 sharshy metrlik úıler 41 mln teńge shamasynda bolady. Bul ákimdikter bólgen jer ýchaskelerine bekitiletin tıptik jobalar boıynsha. Ereje boıynsha, baspananyń quny men kólemi tıptik jobalardan asyp ketse, búdjetten tys kózderden qarjylandyrýǵa bolady. Iaǵnı túrli qorlardyń qarajaty paıdalanylady. Bastysy, Qazaqstan Respýblıkasynyń zańnamalaryna qaıshy kelmeýi kerek», - deıdi QR Ónerkásip jáne qurylys mınıstrligi basqarmasynyń bas sarapshysy Marat Jarbolov.
Mundaı úılerdiń sharshy metri 275 myń teńge bolyp baǵalanady. Bul soma búdjetten tys kózderdiń qarajaty esebinen kóbeıýi múmkin. Qurylys jumystary 1,5 aıdan 2,5 aıǵa deıin júrýi múmkin. Ol úılerdi sý tasqyny qaýpi joq jerlerge salady. Iaǵnı jańa orynda ınfraqurylymdyq jobalaar da salynýy kerek.
Vıktor Mıkrúkov, «Qazaqstan qurylys salýshylar qaýymdastyǵy» tóraǵasy: -
«Mıllıardtaǵan qarajat kerek bolady. Óıtkeni orasan zor shyǵyn keldi. Qazir kásipkerler de belsendi kómek berip jatyr. Bizdiń qaýymdastyqqa kiretin kompanıalar da qorǵa 1,5 mlrd teńge aýdardy. Taǵy 6 mlrd teńge aýdaramyz. Qurylysshylar bul qıyndyqty birge eńserýge barynsha kómektesedi.
«Topan sý ketken soń odan zardap shekken aımaqtar qalpyna keltiriledi. Bul kúrdeli ári jaýapty jumys. Eń aldymen, azamattarǵa shyǵyndaryn óteý úshin tıisti ótemaqy tólenedi. Úı-jaı qurylysy bastalady, baspana beriledi, búlingen ınfraqurylym jóndeledi. Prezıdent retinde men bul jumystarǵa qarjy jumsaýdan aıanyp qalmaımyn. Men úshin, eń bastysy, azamattardyń ál-aýqaty. Osy qyrýar jumys óte az ýaqytta, ıaǵnı jaz ben kúzdiń bes-aq aıynda aıaqtalýǵa tıis. Biraq biz birlesip, bul sharýany abyroıymen atqaryp shyǵamyz dep senemin. Turǵyn úıler men ınfraqurylymdy qalpyna keltirý jumysyn ózim jeke baqylaýǵa alamyn», - dedi Qazaqstan Respýblıkasynyń Prezıdenti Qasym-Jomart Toqaev.
Sý tasqynynan zardap shekken aımaqtardaǵy turǵyndardyń barlyǵy qazan aıyna deıin baspanamen qamtylady. Úkimet rezervinen qazirdiń ózinde 405 mln teńge bólindi. Qarajatqa Qostanaı oblysynda 31 páter satyp alyndy.
Al Aqtóbe, Qaraǵandy, Pavlodar, Batys Qazaqctan men Soltústik Qazaqstan oblystarynda baspana salý úshin jer telimderi bólinip, merdiger uıymdar belgilendi. Qurylys jumystary jaqynda bastalady.