Úkimet otyrysynda Oqý-aǵartý vıse-mınıstri Edil Ospan sý tasqynynan keıin bilim berý mekemelerindegi qalpyna keltirý jumystarynyń barysy týraly baıandady.
Aýqymdy sý 11 myńnan astam bala oqyp jatqan 40 nysandy basty, dep habarlaıdy aqshamnews.kz Oqý-aǵartý mınıstrligine silteme jasap.
Aqmola jáne Soltústik Qazaqstan oblystarynda jóndeý jumystary tolyǵymen aıaqtaldy.
Aqtóbe oblysynda 4 772 oqýshy oqıtyn 7 mektep pen 6 balabaqsha zardap shekti. 4 nysanda qalpyna keltirý jumystary aıaqtaldy. Tórt ǵımaratta kúrdeli jóndeý jumysynyń 90%-dan astamy oryndaldy. 5 jańa nysannyń qurylysy bastaldy. Buǵan Úkimet rezervinen 6,2 mlrd teńge bólindi. Balalardy jaqyn mańdaǵy mektepterge jetkizý jumysy uıymdastyrylǵan.
Atyraý oblysynda 4 myńnan astam bala oqıtyn 5 balabaqsha men 5 mektep sý astynda qaldy. №8 mektepte jóndeý jumystary aıaqtaldy, aǵymdaǵy jóndeý jumystary 6 nysanda 70%-dan 80%-ǵa deıin daıyndyqpen júrgizilip jatyr. Sondaı-aq jóndeý jumystaryn aıaqtaý jáne 280 oryndyq balabaqsha men jataqhanasy bar «Bilim-ınnovasıa» lıseıin salý úshin Úkimet rezervinen 7,7 mlrd teńge bólý josparlanýda. Qurylysty aıaqtaý 2025 jylǵa josparlanǵan. Oqýshylardy oqytý basqa mektepterde uıymdastyrylǵan.
Batys Qazaqstan oblysynda qalpyna keltirý jumystary 3 nysanda aıaqtaldy, al Qostanaı oblysynda Úkimet rezervteri esebinen 897 mln teńge kóleminde 60 oryndyq jańa mektep qurylysy bastaldy.
«Zardap shekken obektilerdi qalpyna keltirý prosesi, jóndeý jumystaryn ýaqtyly aıaqtaý jáne oqý prosesin uıymdastyrý Mınıstrliktiń turaqty baqylaýynda», — dep túıindedi Edil Ospan.