Bul týraly Mádenıet jáne aqparat mınıstri Aıda Balaeva aıtty.
Mınıstr alaıaqtar sý tasqyny jaǵdaıyn ózderiniń jeke maqsatyna paıdalana bastaǵanyn málimdedi, dep habarlaıdy Almaty-akshamy.kz
«Sý tasqyny týraly jalǵan aqparattyń maqsaty – dúrbeleń týdyryp, qazaqstandyqtardy jikke bólip, adastyrý. Qazir elimizdegi sý tasqynymen kúres qarqyndy júrip jatyr jáne onyń qaýpi áli báseńdegen joq. Qarǵyn sýmen kúreske qoldaǵy barlyq kúsh pen rezerv, adam resýrsy men qajetti tehnıkalar túgel jumyldyryldy. Sý basqan óńirlerdiń turǵyndary, olarmen birge jıyrma myńnan astam volonter memlekettik organdarmen birigip jumys istep jatyr», dep jazdy mádenıet jáne aqparat mınıstri Aıda Balaeva.
Mınıstrdiń aıtýynsha, apattar men sý tasqyny týraly jalǵan habarlarǵa baılanysty qutqarý brıgadalarynyń jumys kúshi qajet emes jerlerge baǵyttalǵan jaǵdaılar da bolǵan. Sonyń kesirinen ýaqyt tekke ketip, resýrstar paıdasyz shyǵyn bolyp, aqparat salasyna júrgizilgen monıtorıń barysynda jalǵan aqparat bolyp shyqqan 29 fakti anyqtalǵanyn málimdedi.
Kóp taraǵan jalǵan aqparattar qataryna bógetterdiń buzylýy, respýblıkalyq mańyzy bar joldardy sý basýy, sý qoımalaryndaǵy, elektr stansıalaryndaǵy jáne basqa da strategıalyq obektilerdegi apattar, aýyz sýdyń lastanýy, evakýasıalaý oryndary, qarajat jınaý jáne tóleý týraly jalǵan málimetter jatady.
"Máselen, Aqtóbedegi sý qoımasy shlúzderin ashý týraly áleýmettik jelide jalǵan aqparat tarady. Ony keıin Aqtóbe oblysynyń ákimdigi joqqa shyǵardy", - dep mysal keltirdi mınıstr.
Qostanaı oblysynyń ákimdigi B.Maılın aýdanyndaǵy Aıat ózeni arqyly ótetin kópirdiń bir bóliginiń qulaýy, sondaı-aq óńirdegi mal qorymdaryn sý basqany týraly habarlamany resmı túrde joqqa shyǵardy.
Ol osy faktiler boıynsha tótenshe jaǵdaı qyzmetkerleri sol jerlerge arnaıy barǵanymen, aqparattyń rastalmaǵanyn aıtty.
"Bul kezde basqa jerlerdegi kómekke shyn muqtaj jandar kútip otyratynyn, olardyń arasynda balalardyń bar bolýy múmkin ekenin umytpaıyq", - dedi mınıstr.
Densaýlyq saqtaý mınıstrligi de sý basqan aýmaqtarda juqpaly aýrýlardyń órshý qaýpi jáne epıdemıologıalyq qyzmet tarapynan jaǵdaıdy baqylaýdyń jetkiliksizdigi týraly jalǵan aqparat taraǵanyn málimdep otyr, deıdi Balaeva.
Balaeva tasqynnan zardap shekkenderge arnalǵan tólemder týraly da ádeıi jalǵan habarlamalar taratý úlken qaýip tóndiretinin aıtty.
"Sońǵy kúnderi sý tasqynynan zardap shekkenderge memleket basshysy tarapynan ýáde etiledi degen mıllıondaǵan dollar tólemderi, premer-mınıstr men úkimet músheleriniń atynan aqshalaı qarajat jınaý týraly jalǵan habarlamalar paıda boldy", - dedi aqparat mınıstri.
Balaeva mundaı aqparatqa senbeýge shaqyryp, alaıaqtar sý tasqyny jaǵdaıyn ózderiniń jeke maqsatyna paıdalana bastaǵanyn málimdedi.
"Olar qazaqstandyqtardyń jeke derekteri men qarjy resýrstaryn anyqtaý úshin ınternette "Tólemderdi bilý úshin JSN-di tekserińiz", "3 mıllıon teńgege deıin ótemaqy alý", "Memleketten múmkindiginshe tezirek járdemaqy alý" degen sıaqty habarlamalar jarıalaıdy", - dep jazdy mınıstr.
Balaevanyń aıtýynsha, jarnamalaryn senimdi kórsetý úshin qylmyskerler qazaqstandyq bankter men memlekettik mekemelerdiń ataýyn paıdalanady. Ol mundaı kórineý jalǵan habarlamalardyń barlyǵy memlekettik organdar arqyly jedel joqqa shyǵarylyp, barlyq fakti boıynsha quqyq qorǵaý organdaryna habarlamalar jiberilgenin málimdedi.
Barlyq anyqtalǵan zańsyz faktige quqyqtyq baǵa berý, jedel-izdestirý jáne is júrgizý úshin materıaldar quqyq qorǵaý organdaryna joldandy, deıdi mınıstr.
"Sondyqtan tek resmı jáne rastalǵan aqparatqa senińizder. Barlyq kúmándi faktini birneshe ret tekserińiz jáne kúmándi habarlamalardy ary qaraı taratpańyz", - dep eskertti Balaeva.