Sý tasqynyna daıyndyq aıasynda 239 shaqyrym ózen arnasyn tazartý, keńeıtý jáne túbin tereńdetý jumystary júrgizildi.
Onyń ishinde Ertis ózeniniń 27,4 shaqyrymy, Qıǵash ózeniniń 73,7 shaqyrymy, Nuranyń 1,1 shaqyrymy, Jaıyqtyń 51,5 shaqyrymy jáne Jem ózeniniń 85,5 shaqyrymy tazartyldy, dep habarlaıdy aqshamnews.kz.
Eske salsaq, ótken jyly Sý resýrstary jáne ırrıgasıa mınıstrligi ózen ýchaskelerin sanasıalaýdyń keshendi josparyn qabyldaǵan bolatyn. Qujatqa sáıkes, 2027 jylǵa deıin 10 oblysta jalpy uzyndyǵy 815 shaqyrym bolatyn 51 ózen arnasyn jáne bir kóldi tazartý jumystary qarastyrylǵan.
Budan bólek, Qazsýshar kásiporny elimizdiń birqatar óńirinde 1147 shaqyrym kanaldardy mehanıkalyq tazartýdan ótkizip, 230 sý qurylysyn jóndedi.
Byltyr 36 jylda alǵash ret Aqtóbe sý qoımasyna keshendi rekonstrýksıa jasaldy. Al, Batys Qazaqstan oblysyndaǵy Kırov sý qoımasy 58 jylda birinshi ret jóndeldi.
«Memleket basshysynyń tapsyrmasyna sáıkes elimizdiń 10 oblysynda jańadan komýnaldyq menshiktegi gıdrotehnıkalyq qurylysjaılardy paıdalanýǵa jaýapty mamandandyrylǵan uıymdar quryldy. Olardyń balansyna 809 nysan qabyldandy. 931 maman jumysqa alynyp, 203 arnaıy tehnıka berildi»,- dedi Sý resýrstary jáne ırrıgasıa mınıstri Nurjan Nurjigitov.