Brıtanıa ǵalymdary eldegi sý tasqyndary úırenshikti qubylysqa aınalýy múmkin dep eskertedi. Mamandar muny jahandyq jylynýdyń áserimen baılanystyrady. Sondyqtan, tasqynǵa qarsy kúreske ulttyq deńgeıde mán berý kerek, - deıdi olar.
Sońǵy jarty jyldyń ózinde Ulybrıtanıany 8 túrli dúleı daýyl sharpydy. Jeldiń jyldamdyǵy saǵatyna 130 shaqyrymǵa deıin jetip, jaýyn-shashynnyń kesirinen ózender arnasynan tasydy, dep jazady qazaqstan.tv.
Myńdaǵan úıdi sý basyp, turǵyndar qaza tapty.
"Daýyldardyń kóbeıýine jahandyq jylyný sebep. Ókinishke qaraı, bolashaqta mundaı tabıǵı apattardyń talaıyn kóremiz."Maık Kendon, meteorologıalyq qyzmettiń aǵa ǵylymı qyzmetkeri
Kezinde kovıdpen kúreskendeı sý tasqyndaryna da ulttyq deńgeıde qarsy tura bilý kerek. Úkimet syn-tegeýrinderge daıyn bolyp, eskertýlerge qulaq asady dep úmittenedi ǵalymdar.
"Topan sýǵa tótep berý úshin áreket etýge mindettimiz. Infraqurylymdarymyzdy josparlaýǵa kelgende olardy nyǵaıtý máselelerin basty nazarda ustaýymyz qajet."Kevın Kollınz, OPEN Ýnıversıtetiniń ǵalymy
Jaǵdaı alańdatarlyq. Mamandardyń pikirinshe, atmosferadaǵy kómirqyshqyl gazynyń deńgeıi artyp jatyr. Aýany lastaıtyn zıandy zattardyń áserinen bıylǵy jyl tipti ystyq bolyp, tabıǵı aýytqýlar jıileıdi dep boljanýda.