Úshinshi jyl qatarynan sý tapshylyǵy bolady dep boljanýda.
Gıdravlıkalyq boljamǵa sáıkes, 2022 jyly Qazaqstanda qaıta sý tapshylyǵy bolady. Osyny eskere otyryp, vegetasıalyq kezeńge daıyndyq júrgizilýde. Sarapshylar fermerlerdi ylǵal syıymdy daqyldardyń alqaptaryn qysqartýǵa jáne ylǵal únemdeý tehnologıalaryn qoldanýǵa shaqyrady. Bul týraly AGRITECHNICA digital on tour aıasynda uıymdastyrylǵan sý resýrstaryn basqarý taqyrybyndaǵy dóńgelek ústel barysynda Ekologıa mınıstrligi Sý resýrstary komıteti tóraǵasynyń orynbasary Dosbol Bekmaǵambetov málimdedi, dep habarlaıdy Almaty-akshamy.kz Eldala.kz cilteme jasap.
«1 aqpandaǵy jaǵdaı boıynsha, boljamdar kóńil kónshitpeıdi. Úshinshi jyl, ásirese, ońtústik aımaqtarda sý tapshylyǵy baıqalady. Ótken jáne odan arǵy jyldaǵydaı uqsas senarı bolady dep kútilýde», - dedi Dosbol Bekmaǵambetov.
Ekologıa mınıstrliginiń jumys baǵyttarynyń biri tasymaldaý kezinde sý shyǵynyn azaıtý bolyp tabylady, ol búginde 50%-ǵa deıin jetedi. Uzyndyǵy 7,4 myń km sýarý jelilerin qaıta jańartý, 16 gıdrotehnıkalyq qurylysty, kanaldardy qaıta jańartý jáne sýdy esepke alýdy sıfrlandyrý josparlanǵan.
Dosbol Bekmaǵambetov atap ótkendeı, sýarýǵa arnalǵan barlyq sý tartýdyń 97% jalpy sýarý alańy 1 mln 250 myń ga bolatyn ońtústiktegi tórt óńirge - Almaty, Jambyl, Túrkistan jáne Qyzylorda oblystaryna tıesili. Bul rette atalǵan óńirlerge el boıynsha barlyq sýarmaly alańnyń 77% tıesili. Osyǵan baılanysty sýarmaly sýdyń negizgi shyǵyndary da osy aýdandarda oryn alýda.
«Sońǵy jyldary elimizdiń ońtústik óńirlerinde vegetasıalyq kezeń sý tapshylyǵy sıkly jaǵdaıynda ótýde. Qabyldanǵan sharalardyń arqasynda ótken jyly fermerlerimizdi sýarmaly sýmen turaqty qamtamasyz ete aldyq. Ótken jyldaǵydaı, biz aldyn ala daıyndyq jumystaryn bastadyq. Vegetasıalyq kezeń bastalǵanǵa deıin Memleketaralyq paıdalaný arnalaryn qaıta qurý jalǵasady», - dedi Komıtet basshysynyń orynbasary.
Sondaı-aq, ylǵal syıymdy jáne monodaqyldardyń egis alqaptaryn azaıtý, sý únemdeý tehnologıalaryn engizý, kanaldardy tazartý qarastyrylǵan. Sýarý kezektiligi, kolektorlyq-drenajdyq sýlardy qaıta paıdalaný uıymdastyrylady, sondaı-aq qosymsha sorǵylar ornatylady.
«Úlken qarjy bólindi, atalǵan jumys jalǵasýda», - dep atap ótti Dosbol Bekmaǵambetov.