Sý resýrstary jáne ırrıgasıa mınıstrligi 2024 jyly elimizdiń sý sharýashylyǵy nysandaryn damytý boıynsha 137 jobany iske asyrýdy bastady.
Sondaı-aq, 201 joba boıynsha jobalaý-smetalyq qujattama ázirlenip jatyr, dep habarlaıdy aqshamnews.kz sala mınıstrligine silteme jasap.
Atap aıtqanda, 700 myń gektardan astam sýarmaly jerdi qalpyna keltirý jáne jaqsartý, sondaı-aq jalpy uzyndyǵy 7000 shaqyrym kanal salý jáne rekonstrýksıalaý jumysy júrgizilýde.
«Bul jumystar Sý resýrstaryn basqarý júıesin damytýdyń 2024-2030 jyldarǵa arnalǵan tujyrymdamasyna jáne Sý salasyn damytýdyń 2024-2028 jyldarǵa arnalǵan keshendi josparyna saı júrgizilýde. Budan bólek, atalǵan qujattarda ónimsiz shyǵyndardy azaıtý jáne qosymsha sý kólemin jınaý boıynsha da kóptegen is-sharalar qarastyrylǵan. Mysaly, 2024 jyly Aqtóbe sý qoımasyn rekonstrýksıalaý jumystary aıaqtaldy. Túrkistan oblysyndaǵy Báıdibek-ata jáne Qaraqýys sý qoımalarynyń qurylysy, sondaı-aq Qapshaǵaı jáne Kırov sý qoımalaryn rekonstrýksıalaý bastaldy»,- dedi QR Sý resýrstary jáne ırrıgasıa mınıstrligi Sý resýrstaryn retteý, qorǵaý jáne paıdalaný komıteti tóraǵasynyń orynbasary Gúlmıra Imasheva.