Sý resýrstary jáne ırrıgasıa mınıstri Nurjan Nurjigitov sý únemdeý taqyrybyndaǵy respýblıkalyq sýret jáne shyǵarmalar baıqaýynyń jeńimpazdaryn marapattady.
Úzdik jumystardyń avtorlary planshet, kitaptar, gramota jáne basqa da estelik syılyqtar aldy. Jeńimpaz oqýshylardyń muǵalimderi de alǵys hatpen marapattaldy, dep habarlaıdy Almaty-akshamy.kz.
Qazaqstannyń barlyq óńirinen 1000-nan astam bala qatysqan baıqaýda bes oqýshy jeńimpaz atandy.
Atap aıtqanda, 5-10 jas aralyǵyndaǵy úmitkerler arasynda «Úzdik sýret» nomınasıasy boıynsha Aqtóbe qalasyndaǵy №19 orta mekteptiń 4 synyp oqýshysy Shynybaı Aızere jeńimpaz atandy. Al, 11-16 jas aralyǵyndaǵy qatysýshylar arasynda Pavlodar oblysy Peschanoe aýylyndaǵy erekshe qajettilikteri bar balalardy qoldaý ortalyǵynyń tárbıelenýshisi Sıtnıkov Sergeı úzdik boldy.
Aqtóbe qalasyndaǵy Ál-Farabı atyndaǵy №21 mamandandyrylǵan gımnazıanyń 10 B synyp oqýshysy Maqsat Álıanyń da sýreti marapatqa ıe boldy.
«Úzdik shyǵarma» nomınasıasy boıynsha Astana qalasynyń fızıka-matematıka baǵytyndaǵy NZM 9G synybynyń oqýshysy Nurhat Ámına jáne Atyraý oblysy Qurmanǵazy aýdany M.Áýezov atyndaǵy jalpy orta mekteptiń 8 synyp oqýshysy Baızýl Gúlsim jeńimpaz atandy.
Marapattaý rásiminen keıin Nurjan Nurjigitov baıqaý júldegerlerimen sý resýrstaryn saqtaýdyń mańyzy týraly áńgimelesti.
«Belsendilik tanytyp, baıqaýǵa qatysqan barlyq úmitkerlerge shyǵarmashylyq eńbekteri men sý únemdeý taqyrybyna qyzyǵýshylyq bildirgenderi úshin úlken alǵys aıtqym keledi. Barlyq qatysýshylarǵa mınıstrdiń atynan alǵys hattar tabystalady. Bul bizdiń mınıstrlik uıymdastyrǵan alǵashqy, biraq sońǵy baıqaý emes. Sondyqtan oqýshylardyń óz talanttaryn kórsetý múmkindigi áli de bolady. Baıqaýǵa qatysýshylardyń qabiletin tolyq ashýǵa kómektesken, olarǵa qajetti baǵyt bergen muǵalimderdi de erekshe atap ótkim keledi»,– dedi QR Sý resýrstary jáne ırrıgasıa mınıstri Nurjan Nurjigitov.