Qaıta jańǵyrtylǵan «Astrahan-Mańǵyshlaq» magıstraldy sý qubyry Atyraý jáne Mańǵystaý oblystaryna qosymsha 60 myń tekshe metr sý beredi
Atyraý oblysynda keshendi kúrdeli jóndeý nátıjesinde keńeıtilgen «Astrahan-Mańǵyshlaq» magıstraldy sý qubyry iske qosyldy. QR Premer-Mınıstri Álıhan Smaıylov beınebaılanys arqyly nysan jumysyn resmı túrde iske qosty.
Batys óńiriniń áleýmettik jáne ónerkásiptik damýy úshin strategıalyq mańyzy zor jobany Memleket basshysy Qasym-Jomart Toqaevtyń tapsyrmasy boıynsha júzege asyryldy.
Premer-Mınıstr atap ótkendeı, qaıta jańǵyrtylǵan «Astrahan-Mańǵyshlaq» magıstraldy sý qubyry Atyraý jáne Mańǵystaý oblystarynyń halqy men kásiporyndary jáne aýyl sharýashylyǵy úshin qosymsha 60 myń tekshe metr sý berý kózine aınalady.
Joba sheńberinde tozyǵy jetken jabdyqtardy jańartý jumystary júrgizilip, uzyndyǵy shamamen 177 shaqyrym magıstraldy sý qubyrynyń eki ýchaskesi aýystyryldy. Qurylysqa 500-den astam adam jumyldyrylǵan. Sonyń nátıjesinde «Astrahan-Mańǵyshlaq» sý qubyrynyń ótkizý qabileti táýligine 110-nan 170 myń tekshe metrge deıin artty.
«Sý qubyryn kúrdeli jóndeý belgilengen merzimnen buryn aıaqtaldy. Oǵan tıimdi jobalyq sheshimder men joǵary qurylys qarqyny nátıjesinde qol jetkizildi. Bul joba sońǵysy emes, óńirde sýmen qamtamasyz etýge baılanysty basqa da aýqymdy jobalar bar», — dedi Álıhan Smaıylov.
Máselen, Kendirli kentinde jalpy qýaty táýligine 50 myń tekshe metr bolatyn sý tushshylandyrý zaýyty salynýda. Odan Jańaózen qalasyna deıin uzyndyǵy 105 km magıstraldy sý qubyry tartylady.
Budan basqa, «Kaspıı» sýmen jabdyqtaý zaýytyn rekonstrýksıalaý júrgizilip jatyr. Nátıjesinde onyń qýaty 2 ese, ıaǵnı 40 myń tekshe metrge deıin artady.
«Bizdiń maqsatymyz – 2026 jylǵa qaraı eldi mekenderdi 100% aýyz sýmen qamtamasyz etip, halyq pen óndiris oryndaryn odan ári turaqty sý kózderimen qamtamasyz etý. Ol úshin jańa gıdrotehnıkalyq qurylystar men sý qubyrlaryn salý jáne qazirgi qubyrlardy jańǵyrtý boıynsha jobalar iske asyrylyp otyr. Eldi mekenderge sý taratý jelileri salynýda, al shalǵaı aýyldarda jer asty kózderinen sorǵy modýlderi ornatylyp jatyr. Aldymyzda áli de kóp jumys bar», — dep atap ótti Úkimet basshysy.
«QazMunaıGaz» UK» AQ basqarma tóraǵasy Maǵzum Myrzaǵalıev málim etkendeı, jobany iske asyrý kezinde telekomýnıkasıalyq jáne baqylaý jabdyqtary, katodty qorǵaý stansalary men avtonomdy gıbrıdti qondyrǵylar, sondaı-aq qubyr ónimderiniń bir bóligi otandyq óndirýshilerden satyp alyndy.
Resmı saltanatty sharaǵa Atyraý oblysynyń ákimi Serik Shápkenov, energetıka mınıstri Almasadam Sátqalıev, «Samuryq-Qazyna» AQ basqarma tóraǵasy Nurlan Jaqypov, «QazTransOıl» AQ bas dırektory Talǵat Qurmanbaev, «Magıstraldy sýaǵyzǵy» JSHS bas dırektory Berik Salpek jáne merdiger uıymdardyń ókilderi qatysty.
Anyqtama: «Astrahan-Mańǵyshlaq» magıstraldy sý qubyry 1988 jyly paıdalanýǵa berilgen. Atalǵan sý qubyry – Atyraý oblysynyń Qurmanǵazy, Isataı jáne Jylyoı aýdandary, sondaı-aq Mańǵystaý oblysynyń Jańaózen qalasy, Beıneý, Mańǵystaý, Qaraqıa jáne Túpqaraǵan aýdandarynyń tutynýshylaryn sýmen qamtamasyz etetin jalǵyz ortalyqtandyrylǵan sý kózi. Jalpy, atalǵan qubyrdan sýdy Mańǵystaý oblysy turǵyndarynyń 35%-dan astamy jáne Atyraý oblysy turǵyndarynyń 28%-dan astamy tutynady.