Sý resýrstary jáne ırrıgasıa mınıstrliginen sý qoımalaryndaǵy jaǵdaı málim boldy.
Aqmola oblysynda Astana jáne Sileti sý qoımalary 100%-ǵa toly. Eki nysan da shtattyq kestege saı jumys istep tur, dep habarlaıdy Almaty-akshamy.kz.
Soltústik Qazaqstan oblysyndaǵy 2 iri sý qoımasy 100%-ǵa toly, óńirde sý tasqyny jalǵasyp jatyr. Sergeev sý qoımasy bógetiniń jotasynan sýdyń asý bıiktigi 348 santımetr.
Osy saǵatqa Petropavl qalasy shegindegi Esil ózeniniń deńgeıi - 1284 sm, bir táýlikte 28 sm tómendedi.
Aqtóbe oblysyndaǵy eki iri sý qoımasynyń ortasha sý jınaý kórsetkishi 97%. Eki nysan da shtattyq kestege saı jumys istep jatyr. Óńirdegi ahýal turaqty.
Shyǵys Qazaqstan oblysyndaǵy eki iri sý qoımasy boıynsha ortasha sý jınaý kórsetkishi 81%.
Abaı oblysynda Shúlbi sý qoımasy 67%-ǵa toldy. Óńirde sý tasqyny jalǵasyp jatyr. Shúlbi sý qoımasyna búıirlik aǵyndardyń ulǵaıýyna baılanysty tabıǵatty qorǵaý maqsatynda sý jiberilip jatyr. Ertis kaskadynyń sý qoımalary shtattyq kestege sáıkes jumys istep jatyr.
Batys Qazaqstan oblysyndaǵy tórt iri sý qoımasynyń ortasha sý jınaý kórsetkishi 85%. Olardyń barlyǵy shtattyq rejımde jumys isteıdi. Reseımen shekarada Jaıyq ózeniniń deńgeıi 899 sm.
Qaraǵandy oblysyndaǵy 3 iri sý qoımasy 98%-ǵa tolǵan. Jaǵdaı turaqty.
Qostanaı oblysynda eki iri sý qoımasynyń ortasha sý jınaý kórsetkishi 92%. Eki nysannyń da jumysy shtattyq kestege sáıkes júrip jatyr.
Nysandarda táýlik boıy kezekshilik jalǵasady, saǵat saıyn sý sharýashylyǵy jaǵdaıyna monıtorıń júrgiziledi.