Kóktem kelip, kúnniń jylynǵany kóterińki kóńil-kúı syılap qana qoımaı, keri áseri de bolyp jatady keıde. Qyz-kelinshekterdiń qulpyratyn kezeńi bola tura, keıbir arýlarymyzǵa jaǵymsyz áser beretini de bar. Onyń bir aıǵaǵy – bettegi sekpildiń kóbeıip ketýi.
Sekpil - teridegi dóńgelek ne sopaqsha pishindi, ashyq sary, qara qońyr tústi daq. Ádette bette, qoldyń syrtqy jaǵynda, ıyqta, arqa men keýdede bolady. Keıde, ásirese kóktemgi jáne jazǵy maýsymda sekpildiń kóbeıip ketetini sonshalyq, olar bir-birimen qosylyp, tutas qońyrqaı daqtarǵa aınalady. Qystygúni sekpil birjola joıylyp ketpese de, burynǵysynan azaıa túsedi. Jas ulǵaıa kele, kóbinese 30-dan asqan soń, sekpil óz-ózinen joǵalady. Sekpildi birjolata joıýdyń amaly joq, dep habarlaıdy Almaty-akshamy.kz Ernur.kz-ke silteme jasap.
Degenmen de aldyn-ala jasalatyn emdik sharalardyń máni zor. Kún qyza bastaǵannan (naýryz aıynyń sońy nemese sáýir bastalǵannan) keıin jáne kúzdiń sońǵy aılarynda kóshege shyǵar aldynda betke arnaıy krem jaǵý kerek. Sekpildiń daǵyn baıqatpaý úshin betti qatyqpen, ashyǵan aıranmen sylap, sýtegi asqyn totyǵynyń 3 prosenttik eritindisimen súrtken de tıimdi. Jazǵy ýaqytta betti lımonnyń nemese pisip jetilmegen qaraqattyń shyrynymen súrtken paıdaly. Sekpildi tússizdendirý úshin «Melan», «Ahromın» kremderin paıdalanýǵa bolady. Betti jaqsylap tazalap alǵan soń kremdi jaǵyp, 40-60 mınýt ustap, maqtamen súrtip tastaý kerek. Budan keıin betti jýýdyń qajeti joq.
ESKERTÝ: Bul kremderdi kúndiz kóshege shyǵarda jaǵýǵa jáne júkti áıelderge paıdalanýǵa bolmaıdy. eger múmkindigińiz jetip jatsa, sekpildi birjolata ketirý úshin emdik kosmetıkalyq prosedýralarǵa júgingenińiz durys. Bul árıne, kóktemniń jaǵymsyz áserleriniń biri, sondyqtan, bul mezgilde kún sáýlesiniń áserinen bolatyn bettegi sepkildiń órship ketýinen saqtanǵan durys. Sekpilden arylýdyń birneshe joldary bar jáne onyń áseri árkimge ár túrli. Sekpil bette tym kóbeıip ketpes úshin aldyn ala emdik sharalar jasaǵanyńyz durys.
Ol úshin: - Kóshege shyǵar aldynda kún sáýlesinen qorǵaıtyn maksımaldy áseri bar kremder jaǵyp júrińiz; - Betińizdiń biraz bóligin jaýyp turatyn kún kózinen saqtaıtyn kózildirik pen qalpaq (shlápa) kıip júrińiz; - Eger kún tym ystyq bolsa, kesh túskenshe ǵımarat ishinen múmkindiginshe shyqpaýǵa tyrysyńyz; - Betińizge kún kózinen saqtaıtyn kremnen bólek tonaldy krem nemese opa jaǵyp júrińiz; - Kúndelikti tamaqtaný rasıonyńyzǵa S jáne RR dárýmenderi mol taǵamdardy qosyńyz. Ásirese jemis, kókónisti kóbirek jeýge tyrysyńyz. Bul mezgilde jemister men kókónisterge tapshylyq joqtyń qasy, qoljetimdi bolyp turǵandyqtan, meılinshe sol múmkindikti paıdalanyp qalyńyz.
Sekpildi ketirý
1. Pıazdyń, lımonnyń sólin jáne asqa paıdalanatyn sirkesýdy (árqaısysyn 25 gramnan) bir ydysqa quıyp, aralastyryp, betińizge 25 ret maska jasańyz. 2. Sýteginiń 3 paıyzdyq totyǵynyń 100 gramyn 5 gram músátir spırtine aralastyryp, betińizdi ylǵaldańyz. 15 mınýttan keıin teri aǵartatyn krem jaǵyńyz. 3. Bir túıir lımonnyń sóline 100 gram bal aralastyryp, ony betińizge 1-5-10 márte jaǵyńyz. Sodan soń jyly sýmen shaıyp tastańyz. 4. Osyndaı maska jasaýmen qatar S dárýmenin (20-30 kún boıy 1-1,5 gramnan) jáne RR dárýmenin (nıktolamıd, nıktotın qyshqyly) kúnine 3 túımedaqtan qabyldaǵan jón.
Betińizdegi sekpilder kóbeıip, qaraıyp úlgerse: 1) Bettiń terisin aǵartýǵa arnalǵan kosmetıkalyq quraldardy (krem, gelder) qoldanyńyz; 2) Quramynda S dárýmeni kóp jemis, kókónistermen (lımon, qulpynaı, qaraqat) kún saıyn qorektenińiz; 3) Terini aǵartatyn qospalary bar maskalar jasap, (aqjelkek (hren), aqjelken (petrýshka), qıar, lımon shyryny) betińizge jaǵyp júrińiz. Betińizge maskany jaqqannan keıin terińizdi kún kóziniń tikeleı túsýinen saqtańyz. Terini aǵartatyn maskalardyń barlyǵy da 2-3 aptada óz nátıjesin beredi.