Sý resýrstary jáne ırrıgasıa mınıstrligi Parlament Májilisiniń depýtattary jáne sarapshylarmen birlesip jańa Sý kodeksiniń jobasyn pysyqtaýda.
Qorshaǵan ortany qorǵaý maqsatynda qujatqa alǵash ret shaǵyn kólderdi, ózender men toǵandardy, sondaı-aq muzdyqtar men sýly-batpaqty aımaqtardy qorǵaý jóninde normalar engizildi, dep habarlaıdy aqshamnews.kz cala mınıstrligine silteme jasap.
Mysaly, shaǵyn ózenderdiń tartylýynyń aldyn alý úshin tasqyn sýdy ótkizýge arnalǵan qurylystary joq nysyndardy, sý aǵynyn toqtatatyn bógetterdi jobalaýǵa jáne salýǵa tyıym salynady. Jańa Sý kodeksiniń jobasyna sáıkes mundaı qurylystar joıylatyn bolady.
Sharýashylyq qyzmeti shaǵyn sý aıdyndarynyń jaı-kúıine áser etetin jeke jáne zańdy tulǵalar mınıstrliktiń baseındik ınspeksıalarymen kelise otyryp, sý resýrstaryn qalpyna keltirý jáne onyń tazalyǵyn saqtaý jónindegi is-sharalardy júrgizýge mindetti.
Sýly-batpaqty jerlerdi lastaýǵa, biteýge, qurǵatýǵa nemese ózge maqsattarda paıdalanýǵa tyıym salynady. Sondaı-aq, sırek kezdesetin jáne joıylyp ketý qaýpi tóngen túrlerdi qosa alǵanda janýarlardy qorǵaý jónindegi is-sharalar da kózdeledi.
Budan bólek, muzdyqtar men qarly aımaqtarǵa aǵyn sý jiberý, olardy qaldyqtarmen, munaı ónimderimen, ýly hımıkattarmen jáne basqa da zıandy zattarmen lastaýǵa tyıym salynady. Muzdyqtardan muz alý sý nysandarynyń jaǵdaıyna keri áser etpeýi tıis jáne olardyń sarqylýyna sebep bolmaýy kerek.
«Jańa Sý kodeksi klımattyń ózgerýine beıimdelýge jáne sý únemdeý prınsıpterin engizýge basa nazar aýdarady. Sý aıdyndarynyń ekojúıesin qoldaý jáne olardy sarqylý, lastaný syndy basqa da jaǵymsyz saldardan qorǵaý úshin sýdyń eń tómengi ruqsat etilgen deńgeıi aıqyndalǵan – «ekologıalyq aǵyn» uǵymy engiziledi. Qujattyń maqsaty – ekonomıkanyń turaqty damýyn qamtamasyz ete otyryp, azamattardyń ómir súrý sapasyn jaqsartýǵa jáne qorshaǵan ortany saqtaýǵa múmkindik beretin sý paıdalanýdyń qaýipsiz deńgeıine qol jetkizý jáne ony qoldaý bolyp tabylady»,- dedi Sý resýrstary jáne ırrıgasıa birinshi vıse-mınıstri Bolat Beknıaz.