Qazaqstannyń 9 oblysynda sý qoımalary kúrdeli jóndeý jumystary júrgiziletin bolady.
QR Sý resýrstary jáne ırrıgasıa mınıstrligi ázirlegen Sý sharýashylyǵyn damytýdyń 2024-2030 jyldarǵa arnalǵan keshendi jospary sheńberinde elimizdegi 15 sý qoımasy rekonstrýksıadan ótedi, dep habarlaıdy Almaty-akshamy.kz.
Mınıstrliktiń málimetinshe, bul nysandardyń jalpy kólemi 1,9 tekshe shaqyrymdy quraıdy.
Atalǵan sý qoımalaryn rekonstrýksıalaý 70 myń adam turatyn 64 eldimekendi sý basý qaýpin azaıtýǵa, sondaı-aq 74 myń ga sýarmaly jerge sý berýdi jaqsartýǵa múmkindik beredi
«Sý resýrstary jáne ırrıgasıa mınıstri retinde jumys istegen 3 aıda elimizdiń 10 oblysyna baryp, sý qoımalaryn jáne basqa da mańyzdy sý ınfraqurylymy nysandaryn araladym. Ótken aptada aýdıtorlyq palata basshysy uzaq jyldardan keıingi tekseris nátıjelerin jarıalady. Alda gıdrotehnıkalyq nysandardy qalpyna keltirý, tehnologıalardy engizý syndy jáne t.b. kóptegen jumys tur. Gıdrotehnıkalyq qurylystar 30 jyldan 50 jylǵa deıin kúrdeli jóndeýsiz jáne rekonstrýksıasyz paıdalanylýda, sondyqtan qaýiptiligi joǵary nysandar bolyp tabylady. Komýnaldyq jáne jeke menshiktegi jekelegen qurylystardaǵy jaǵdaı asa kúrdeli», – dedi QR sý resýrstary jáne ırrıgasıa mınıstri Nurjan Nurjigitov.
Jumys istep turǵan nysandardy jóndeýmen qatar, keshendi jospar Qazaqstannyń 9 oblysynda kólemi 2,4 tekshe shaqyrym bolatyn 20 jańa sý qoımasyn salýdy da kózdeıdi. Jospardy iske asyrý sý resýrstarynyń kólemin 3,7 tekshe shaqyrymǵa ulǵaıtýǵa, sýarmaly jerlerdiń aýmaǵyn 2,2 mln gektarǵa deıin keńeıtýge, sýarmaly sýdyń jyl saıynǵy shyǵynyn azaıtýǵa jáne onyń kólemin 3 tekshe shaqyrymǵa deıin ulǵaıtýǵa múmkindik beredi.