Ál-Farabı atyndaǵy Qazaq Ulttyq ýnıversıteti Fılosofıa jáne saıasattaný fakúltetinde Dintaný mamandyǵynyń 1 kýrs stýdentterine arnalǵan «Sen halqyńnyń júregindesiń, jaýynger!» atty tárbıe saǵaty ótti. 15 aqpan – Aýǵan jerinen keńes áskerleriniń shyǵarylǵan kúnine oraı uıymdastyrylǵan bolatyn. Sharanyń maqsaty – aýǵan soǵysy ardagerlerine qurmet kórsetý, jat jerde kóz jumǵan jerles azamattardy eske alý jáne jastarǵa patrıottyq tárbıe berý. Sharaǵa jalyndaǵan jastyq shaǵyn oq pen ot arasynda ótkizip, elge aman-saý oralyp, týǵan jerimen qaýyshqan ınternasıonalıs-jaýyngerler, atap aıtqanda «Abyroı» Aýǵan soǵysy ardagerleri odaǵynyń tóraǵasy Daýylbek Álı Narımanuly jáne onyń birqatar jaýynger-ardagerler arnaıy keldi. Dintaný jáne mádenıettaný kafedrasynyń profesory Qarlyǵash Borbasova jıynda óziniń alǵysózin aıtyp, qazirgi tańda stýdentter úshin aýǵan soǵysy ardagerleriniń estelik áńgimelerin tyńdaý ónegeli tárbıe dep atap ótti.
Aýǵan soǵysynyń ardager jaýyngerleri stýdentterge týǵan elin súıý, qurmetteýge baýlıtyn taǵlymdy aqyl-keńesterin aıtty:
«Biz barlyǵymyz óz otanymyzdyń patrıoty bolýymyz kerek. Ókinishke oraı, bizdiń qoǵamda memleketimiz aldyndaǵy áskerı mindetterin atqarýdan qashady. Bul durys emes. Ultaraqtaı jerimizdi ata-babalarymyz naızanyń ushymen bizder úshin amanat etip saqtap qaldy. Sondyqtan otan aldyndaǵy boryshty óteýge mindettimiz!», – dedi.
Ashyq sabaq barysynda Dintaný mamandyǵynyń 1 kýrs stýdentteri aýǵan soǵysynda júrek tebirenterlik erlik kórsetkeni úshin alǵystaryn bildirdi.
