Almaty qalasynyń Medeý aýdanynda polısıa qyzmetkerleri áıelge shabýyl jasaǵan qaraqshyny jedel anyqtap, ustady.
Qylmys kópqabatty turǵyn úıdiń kireberisinde oryn alǵan, dep habarlaıdy aqshamnews.kz
Belgili bolǵandaı, er adam táýliktik jalǵa páter alý syltaýymen rıeltormen kezdesken. Ekeýi ońasha qalǵan sátti paıdalanyp, kúdikti áıeldi qorqytyp, kúsh qoldanamyn dep ses kórsetken. Ol jábirlenýshiniń uıaly telefonyn tartyp alyp, keıin joldan ótip bara jatqan kólikti toqtatyp, oqıǵa ornynan izin sýytqan.
- Jedel-izdestirý sharalary barysynda kúdikti tez arada anyqtalyp, quryqtaldy. Qazir ol ýaqytsha qamaýda otyr, – dep málimdedi Medeý aýdandyq polısıa basqarmasyna qarasty polısıa bóliminiń basshysy Eldos Baqbergenov.
Tergeý múddesine baılanysty QR Qylmystyq kodeksiniń 201-babyna sáıkes ózge málimetter jarıa etilmeıdi. Sonymen qatar QR Konstıtýsıasynyń 77-babynyń 3-bóliminiń 1-tarmaǵyna jáne QR QK-niń 19-babynyń 1-tarmaǵyna sáıkes, sot úkimi zańdy kúshine engenge deıin kez kelgen azamat kinásiz dep tanylady.