«Strandj» týrnıri kishi álem chempıonaty retinde baǵalanady
Qazaqstandyq Erasyl Tańqaı Bolgarıa astanasy Sofıa qalasynda ótip jatqan bokstan halyqaralyq «Strandj-2023» týrnırinde alǵashqy jekpe-jegin ótkizdi, dep habarlaıdy Almaty-akshamy.kz QazAqparatqa silteme jasap.
El quramasynan birinshi bolyp rıngke shyqqan ol, 60 keli salmaqta ıtalıalyq Danıele Salernomen qolǵap túıistirdi. Jekpe-jek barysynda ol qarsylasyn úshinshi raýndta tehnıkalyq nokaýtpen jeńdi. Ekinshi jáne úshinshi raýndtarda Italıa boksshysyn nokdaýnǵa da jibergen edi.
Osylaısha ol jarystyń 1/8 fınalyna joldama aldy.
Mamandar arasynda «Strandj» týrnıri kishi álem chempıonaty retinde baǵalanady.
Halyqaralyq týrnır 19-27 aqpan aralyǵynda ótedi.
Bylǵary qolǵap básekesi 1950 jyldan beri turaqty túrde uıymdastyrylyp keledi. Atalǵan týrnır 2024 jylǵy Jazǵy Olımpıada oıyndaryna irikteý kezeńi sanalady.
Byltyr atalǵan týrnırde qazaqstandyq boksshylar 17 medalmen (4 altyn, 4 kúmis, 9 qola) jalpykomandalyq esepte ekinshi oryn alǵan edi.
Bıylǵy «Strandj» kýbogindegi qazaqstandyqtardyń qarsylastary týraly buǵan deıin jazǵan bolatynbyz.